ВАШИНГТОН, 29 май. /“Дунё” АА/. Футбол бўйича Ўзбекистон миллий терма жамоасининг FIFA Жаҳон чемпионатида қатнашиш учун АҚШга етиб бориши ижтимоий тармоқларда кенг жамоатчиликда катта қизиқиш уйғотди, деб хабар бермоқда “Дунё” АА мухбири.

Хусусан, АҚШдаги Ўзбекистон элчиси Фурқат Сидиқовнинг ижтимоий тармоқлардаги саҳифаларида миллий терма жамоамизнинг етиб келиши билан боғлик постлар деярли ярим миллионга яқин кўрилган.

Эслатиб ўтамиз, 26 май куни Ўзбекистон миллий терма жамоаси Нью-Йоркдаги Жон Кеннеди номидаги халқаро аэропортда тантанали равишда кутиб олинган эди. Тадбирга АҚШда фаолият юритаётган машҳур медиа-инфлюенсерлар, блогерлар ва етакчи оммавий ахборот воситалари вакиллари жалб этилган.

Келгусида жамоанинг Жаҳон чемпионатидаги иштироки билан боғлиқ материалларнинг медиа қамрови янада кенгайиши кутилмоқда. Бу ҳолат Ўзбекистоннинг турнирга чиқиши Марказий Осиё минтақаси учун тарихий аҳамиятга эга эканини ҳисобга олганда, табиийдир.

Миллий терма жамоа иштирокига нафақат Ўзбекистон мухлислари, балки қўшни давлатлар аҳолиси ҳам катта қизиқиш билдирмоқда. Бу эса жамоанинг Жаҳон чемпионатидаги иштироки минтақавий миқёсда катта жамоатчилик эътиборига сабаб бўлаётганини кўрсатади.