ТОШКЕНТ, 27 ноябрь. /"Дунё" АА/. Самарқанд вилоятида Ўзбекистон ташқи ишлар вазири ўринбосари Олимжон Абдуллаев ва Приморск ўлкаси губернатори Олег Кожемяко ўртасида учрашув бўлиб ўтди, деб хабар бермоқда "Дунё" АА мухбири.

Томонлар Ўзбекистон ва Приморск ўлкаси ўртасидаги ҳудудлараро ҳамкорликни янада кенгайтириш истиқболларини муҳокама қилдилар. Мулоқотда икки томонлама ҳамкорликка оид кенг кўламли масалалар кўриб чиқилди.

Губернатор Олег Кожемяко Иккинчи жаҳон уруши йилларида Ўзбекистон қўшган ҳиссани юқори баҳолаб, жумладан, минглаб рус ва бошқа миллат болаларини қабул қилган ўзбек халқининг қаҳрамонлигини алоҳида таъкидлади. У Приморск ўлкаси Ўзбекистон билан ҳамкорликни чуқурлаштиришдан манфаатдор эканини алоҳида қайд этди.

Учрашувда Ўзбекистондан меҳнат мигрантларини жалб қилиш масалаларига алоҳида эътибор қаратилди. Бу борадаги ўзаро ҳамкорликни тизимлаштириш учун Приморск ўлкаси ҳукумати таркибида Ўзбекистон фуқароларини танлаш ва ишга жойлаштириш жараёнини назорат қилувчи, уларнинг меҳнат ҳуқуқларини ҳимоя қиладиган ва янги шароитларга мослашувчи махсус бўлим ташкил этиш режалаштирилмоқда.

Учрашувда истиқболли ташаббуслар, жумладан, 2025 йилда Самарқанд шаҳрида миграция масалалари бўйича Приморск ўлкаси ваколатхонасини очиш масалалари муҳокама қилинди.

Учрашув якунида Приморск ўлкасида миграция сиёсатини юмшатишга қаратилган келишувларга эришилди.