МEЛЛEНДОРФ, 22 октябрь. /"Дунё" АА/. Германиянинг оммабоп "Hannoversche Allgemeine Zeitung" газетасида ушбу мамлакатга касбий таълим дастури бўйича ўқишга келган ўзбекистонлик ёшлар ҳақида мақола чоп этилди, деб хабар бермоқда "Дунё" АА мухбири.

"Яқинда Қуйи Саксония федерал ўлкасининг "Bau ABC" Меллендорф Йўл қурилиши бўйича касб-ҳунар таълим марказида ўн тўрт нафар билимли, ғайрат ва шижоатли ўзбек ёшлари ўқишни бошлашди", – деб ёзилган нашрда.

Таъкидланишича, Ўзбекистон ёшлари дастлаб юртимиздаги Гёте-Институтида немис тилини В1 даражада ўрганиб, Касб-ҳунар таълим маркази томонидан пилот лойиҳа доирасида Германияга таклиф этилган. Талаблар ва Қуйи Саксониядаги тегишли қурилиш корхоналари ўртасида касбий дуал таълим шартномаси тузилган. Улар ўқишнинг биринчи йили немис тенгқурлари қаторида Марказда амалий ва назарий фанлардан билим оладилар. Кейинги ўқув йилидан бошлаб бир вақтнинг ўзида қурилиш ташкилотларида ишлайдилар.

"Ўзбекистон ёшлари шижоати, билим олиш ва ишлашга бўлган иштиёқи билан бошқалардан ажралиб туради. Германия тартиб-қоидаларига ҳам тез ўрганишди. Берилган топшириқларни ўз вақтида ва иштиёқ билан бажаришларини кўриш завқ бағишлайди",– деяди марказ ўқитувчиси Андре Раутерберг сўзларидан иқтибос келтирилган материалда.

Шунингдек, мақолада ватандош ёшларимизнинг фикрлари келтирилган. Хусусан, 19 ёшли Оятилла Аҳмадалиев ўқиш ва яратилган шароитлардан жуда мамнунлигини ҳамда касбий таълимни тугатганидан сўнг соҳа бўйича ўқишни давом эттириб, Германияда ишлаш истагини билдирган.

"Германияга касбий таълим олиш учун жалб қилинаётган ёшлар сони ортиб бормоқда. Бу борада "Papenburg" ва "Depenbrock" каби йирик қурилиш компаниялари етакчилик қилмоқда. Ушбу пилот лойиҳадан сўнг Ўзбекистондан янада кўпроқ ёшларни жалб этиш кўзда тутилган", – дейилган немис босма нашри мақоласида.