ВАШИНГТОН, 26 январь. /“Дунё” АА/. Ўзбекистон элчихонаси дипломатлари АҚШнинг Виржиния штатидаги “Kerolayn” ва “Farmvill” хорижий фуқароларни вақтинча сақлаш марказларига ташриф буюриб, марказда сақланаётган Ўзбекистон фуқаролари билан учрашди, деб хабар бермоқда “Дунё” АА мухбири.

Суҳбат давомида ушбу марказларда ватандошларни сақлаш шароитлари, соғлиғи ва умумий аҳволи, овқатланиши ва бошқа маиший масалалари ўрганилди. Ўзбекистон фуқароларига консуллик ва ҳуқуқий масалалар бўйича тегишли тушунтиришлар берилди.

Ўзбекистонликларнинг маълум қилишича, улар АҚШга ноқонуний кириб келгани сабабли ҳозирда депортация масаласида суд ишлари олиб борилмоқда. Шу муносабат билан, улар Ўзбекистонга тезроқ қайтишда кўмак сўраб мурожаат қилишган.

Мамлакатимизнинг АҚШдаги элчихонаси ўз ваколатлари доирасида фуқароларни Ўзбекистонга қайтариш масалалари бўйича хорижий томонлар билан тегишли музокаралар ўтказишга, зарур консуллик ҳужжатларини тайёрлашда амалий ёрдам кўрсатишга тайёрлигини билдирди.

Шу билан бирга, АҚШнинг иммиграция сиёсатидаги сўнгги ўзгаришларни инобатга олган ҳолда, хорижда бўлиб турган Ўзбекистон фуқароларига яна бир бор ўзлари бўлиб турган мамлакатда қонуний бўлиш, маҳаллий қонунларга қатъий риоя қилиш ва ноқонуний фаолиятдан тийилиш тавсия этилди.

Зарур ҳолларда Ўзбекистоннинг АҚШдаги элчихонаси консуллик бўлими билан қуйидаги алоқа каналлари орқали боғланиш мумкин:

• Телефон: +1 (202) 887-5300

• Электрон почта: consul.washington@mfa.uz

Эслатиб ўтамиз, жорий йилнинг 21 январь куни АҚШда ноқонуний бўлиб тургани учун мамлакатдан чиқариб юборилган 44 нафар Ўзбекистон фуқароси Тошкентга келганди. Чартер рейси АҚШнинг тегишли миграция хизматлари томонидан ташкил этилган.