АЛ-КУВАЙТ, 24 май. /"Дунё" АА/. Таниқли  журналист ва блогер Абдулкарим ал-Ҳиндал Ўзбекистоннинг Кувайтдаги туризм элчиси этиб тайинланди, деб хабар қилмоқда "Дунё" АА мухбири.

Ўзбекистон элчихонасида шу муносабат билан Абдулкарим ал-Ҳиндал ва "Unique Travel" компанияси ижрочи директори Суад ал-Маҳри билан учрашув ташкил этилди.

 Учрашув аввалида кувайтлик машҳур блогер Абдулкарим ал-Ҳиндалга Ўзбекистоннинг Кувайтдаги туризм элчиси этиб тайинлаш тўғрисидаги қарор ва сертификат тантанали равишда топширилди.

Абдулкарим ал-Ҳиндал Ўзбекистон ҳукумати ва мамлакатимиз элчихонасига Ўзбекистоннинг Кувайтдаги туризм элчиси этиб тайинлангани учун миннатдорлик билдирди ҳамда юртимизнинг г сайёҳлик салоҳиятини кенг тарғиб қилишга барча куч ва имкониятини сафарбар этишини билдирди.

"Ўзбекистоннинг Кувайтдаги туризм элчиси этиб тайинланганимдан жуда хурсандман. Менга билдирилган ишонч жуда катта масъулият ҳамдир. Ўзбекистонга бўлган сафарларим давомида ўзбек халқининг меҳмондўстлиги ва очиқ кўнгиллигига шахсан гувоҳ бўлганман. Шунингдек, Ўзбекистоннинг Самарқанд ва Бухоро каби шаҳарларидаги қадимий обидаларнинг гўзаллиги мени ўзига мафтун этди. Ўзбек миллий таомлари, жумадан, палов менга жуда ёқди. Келгусида Ўзбекистон элчихонаси билан биргаликда юртингиз сайёҳлик салоҳиятини кенг тарғиб қилиш бўйича ишларни янада жадаллаштирамиз", деди у.

Мулоқот давомида элчихона билан ҳамкорликда Кувайтда мамлакатимиз туризм салоҳияти ва Ўзбекистон туризм брендини кенг тарғиб қилиш, сайёҳлик лойиҳаларини амалга ошириш, етакчи ОАВда юртимиз салоҳияти ҳақида мақолалар чоп этиш бўйича келишиб олинди.

Кувайтнинг "Unique Travel" компанияси ижрочи директори Суад ал-Маҳри билан кечган мулоқот чоғида кувайтлик сайёҳлар учун Ўзбекистонга доир туристик дастурларни ишлаб чиқиш ва уларни кенг жамоатчилик ўртасида тарғиб қилишга аҳдлашиб олинди.

 Кувайт вакиллари Ўзбекистон Президенти қарори билан жорий йилнинг 1 июнидан бошлаб Кувайт фуқароларининг мамлакатимизга 30 кунлик муддатга визасиз тартибда киришлари ҳақидаги муҳим маълумотни юксак баҳоладилар.

Ўзбекистоннинг Кувайтдаги туризм элчси Абдулкарим Фалиҳ Муншид Ҳасан ал-Ҳиндал 1970 йил 1 июлда туғилган. Кувайт университетини тамомлаган. 1990-2012 йилларда Кувайт миллий телевидениеси мухбири, режиссёри, медиа-консультанти, "Wаdhа" журнали бош муҳаррири, "Ал-Атаа" телеканали вице-президенти лавозимларида ишлаган. Ҳозирги кунда мустақил ижодкор сифатида "Instagram"да ўз блогини юритади. Унинг "Instagram" ижтимоий тармоғидаги аккаунтини 21,2 миллион киши кузатиб боради.

 У 160 дан ортиқ халқаро фестивалларда иштирок этган. "Happiness International Bank" томонидан бахт элчиси, "British Ismail University" томонидан тинчлик элчиси дея эътироф этилган. 2018 йилнинг "Энг яхши халқаро шахси" унвонга сазовор бўлган.