ТЕРМИЗ, 14 июнь. /"Дунё" АА/. Ўзбекистон ва Беларусь ташқи ишлар вазирлари Бахтиёр Саидов ва Максим Риженков бугун Ўзбекистон-Афғонистон чегарасида учрашиб, минтақавий хавфсизлик, транспорт-логистика лойиҳалари ва Афғонистондаги вазият юзасидан фикр алмашдилар, деб хабар бермоқда "Дунё" АА мухбири ТИВ матбуот котиби Ахрор Бурхановнинг telegram-каналидаги маълумотга таяниб.

Учрашув чоғида томонлар Афғонистон орқали ўтувчи савдо йўлларини кенгайтириш, инсонпарварлик ёрдамларини мувофиқлаштириш ва чегаравий ҳудудларда барқарорликни таъминлаш масалаларига алоҳида эътибор қаратдилар.

Шунингдек, икки давлат ташқи сиёсат идоралари раҳбарлари Ўзбекистон ва Беларусь ўртасидаги ҳамкорликни минтақавий форматларда янада чуқурлаштириш зарурлигини ҳам таъкидладилар.