ТОШКЕНТ, 27 июль. /“Дунё” АА/. Ўзбекистон ташқи ишлар вазири Бахтиёр Саидов бугун Аргентинанинг янги тайинланган элчиси Энрике Игнасио Феррера Виейрани қабул қилди, деб хабар бермоқда “Дунё” АА мухбири.

“Аргентина Республикасининг Ўзбекистон Республикасидаги Фавқулодда ва Мухтор Элчиси этиб тайинланган Энрике Игнасио Феррера Виейра жанобларидан ишонч ёрлиқларини қабул қилдик, – деб ёзди Ўзбекистон ТИВ раҳбари ўзининг telegram-каналида. – Бугун мамлакатларимиз ўртасидаги муносабатларнинг мавжуд салоҳиятидан янада самарали фойдаланиш, сиёсий мулоқотни фаоллаштириш ва ташқи ишлар вазирликлари ўртасидаги алоқаларни институционал асосда мустаҳкамлаш муҳим аҳамият касб этмоқда.

Савдо-иқтисодий ҳамкорликни икки томонлама муносабатларнинг асосий устунларидан бирига айлантириш тарафдоримиз.

Элчи жанобларига мамлакатимиздаги дипломатик миссиясини амалга оширишда улкан муваффақиятлар тиладик”.

Эслатиб ўтамиз, Ўзбекистон ва Аргентина ўртасида дипломатик муносабатлар 1993 йил 9 сентябрда ўрнатилган.

“Дунё” АА олган сурат