SANKT-PЕTЕRBURG, 6-oktabr. /“Dunyo” AA/. Mamlakatimiz Bosh konsulxonasi ko‘magida Sankt-Peterburgning tarixiy markazida O‘zbekiston yoshlar ittifoqi tomonidan taniqli “Peterburg Kodi: Qayta yuklash” piyodalar kvesti tashkil etildi, deb xabar bermoqda “Dunyo” AA muxbiri.

Tadbirda ushbu shahar oliy o‘quv yurtlarida tahsil olayotgan o‘zbekistonlik talabalar faol ishtirok etdi. 

Besh kilometrlik masofani o‘z ichiga olgan marshrut shahrimizning bosh diqqatga sazovor joylarini qamrab oldi. Har bir jamoa Peterburg me’morchiligiga bog‘liq noyob nom olib, o‘zlarining ijodiy va maxsus topshiriqlarini bajardilar. Xususan, “Nevskiye Navigatori” jamoasi Isaakiy sobori qurilishi va uning blokada yillaridagi faoliyatini o‘rgangan bo‘lsa, “Bronzoviye Straji” Petr I yodgorligi ramzlarini tahlil qildi, “Zolotiye Kupola” esa Qozon sobori kolonnadasida optik illyuziyalarga oid vazifalarni bajardi.

Kvestning faol qismi Bosh konsulxona binosida yakunlandi. Bu yerda talabalar uchun marshrutlar davomida olingan tarixiy bilimlar bo‘yicha intelektual blis-so‘rov o‘tkazildi. Viktorinadan so‘ng ishtirokchilar uchun an’anaviy o‘zbek dasturxoni tashkil etildi.

Rasmiy qismda Bosh konsulxona xodimlari so‘zga chiqib, madaniy aloqalarni saqlab qolish va milliy do‘stlikning ahamiyatini ta’kidladilar. Kechaning kulminatsiyasi sifatida tadbir koordinatori Moxinur Komolova g‘oliblarni taqdirlash marosimini o‘tkazdi. 

Yetakchilar viktorinadagi bilimdonlik, eng kreativ suratlar, tezkorlik va jamoaviy ruh kabi to‘rtta nominatsiya bo‘yicha esdalik sovg‘alari bilan taqdirlandilar.