KIYEV, 28-sentyabr. /"Dunyo" AA/. "Uzbekistan Airways" davlat aviakompaniyasining aksiyalarini dastlabki ommaviy joylashtirish (IPO) 2027-yilga ko‘chirildi, deb xabar bermoqda "Dunyo" AA muxbiri Ukrainaning "Fixygen" axborot portaliga tayanib.

Avvalroq kompaniya aksiyalarining 15–20 foizini 2026-yilning ikkinchi yarmida joylashtirish rejalashtirilgan edi. Hozirda "Uzbekistan Airways"ni transformatsiya qilish va birjaga chiqishga tayyorgarlik ko‘rish ishlari davom ettirilmoqda.

Aviakompaniya uchun 115 ta tashabbusni o‘z ichiga olgan dastur ishlab chiqilgan. U operatsion samaradorlikni oshirish, tijorat faoliyati va yo‘lovchilarga xizmat ko‘rsatishni takomillashtirish, shuningdek, korporativ boshqaruvning xalqaro standartlarini hamda investorlar bilan hamkorlik qilish mexanizmlarini joriy etishni nazarda tutadi.

Hisob-kitoblarga ko‘ra, dastur amalga oshirilgandan so‘ng «Uzbekistan Airways»ning potensial qiymati 1,6 milliard dollardan 2,3 milliard AQSH dollargacha o‘sishi mumkin. Shu bilan birga, yakuniy kapitallashuv investorlarning qiziqishi, kompaniyaning moliyaviy va operatsion natijalari hamda o‘tkazilayotgan transformatsiyaning samaradorligiga bog‘liq bo‘ladi.

Ochiq ma’lumotlarga ko‘ra, "Uzbekistan Airways"ning 2025-yildagi tushumi 18,3 trillion so‘mni (qariyb 1,5 milliard dollar) tashkil etib, 2024-yilga nisbatan 4,3 foizga oshgan.