TOSHKENT, 23-oktabr. /“Dunyo” AA/. Kecha Toshkentda O‘zbekiston va Bolgariya tashqi ishlar vazirliklari o‘rtasida siyosiy maslahatlashuvlarning 4-raundi bo‘lib o‘tdi, deb xabar bermoqda “Dunyo” AA muxbiri.

TIV xabariga ko‘ra, O‘zbekiston delegatsiyasiga tashqi ishlar vaziri o‘rinbosari Muzaffar Madrahimov, Bolgariya delegatsiyasiga esa tashqi ishlar vaziri o‘rinbosari Ivanka Tasheva boshchilik qildi.

Tomonlar siyosiy-diplomatik hamkorlikning bugungi holati va rivojlanish istiqbollari, savdo-investitsiya sohasidagi o‘zaro aloqalarni faollashtirish, madaniy-gumanitar rishtalarni kengaytirish hamda xalqaro tashkilotlar doirasidagi muloqotni chuqurlashtirish masalalarini atroflicha muhokama qildi.

Dolzarb xalqaro va mintaqaviy masalalar yuzasidan fikr almashildi.

Maslahatlashuvlar yakunida O‘zbekiston–Bolgariya hamkorligini yanada kengaytirish va erishilgan kelishuvlarni amalga oshirish ta’kidlandi.