SAMARQAND, 6-may. /“Dunyo” AA/. Avstriya Moliya vazirligi vakili Verena Xagg “Dunyo” AA muxbiriga bergan intervyusida Samarqandda bo‘lib o‘tayotgan OTB Boshqaruvchilar kengashining 59-yillik yig‘ilishining ahamiyati haqida fikr bildirdi:

– O‘zbekiston ushbu tadbirga ikkinchi bor mezbonlik qilmoqda. Bu mamlakatning xususiy kompaniyalar va xalqaro hamkorlik uchun ochiqligidan dalolat. Qolaversa, ushbu tashabbuslar iqtisodiy islohotlar va yana-da qulay investitsiya muhitini yaratishga bo‘lgan qatʼiy intilishni ko‘rsatadi.

Ochilish marosimi, ayniqsa, Prezident Shavkat Mirziyoyevning nutqi katta taassurot qoldirdi. U o‘z nutqida O‘zbekistonning so‘nggi yillarda bosib o‘tgan yo‘liga to‘xtalib, iqtisodiyotni liberallashtirish, xususiy sektorni rivojlantirishni qo‘llab-quvvatlash va jamiyatga yana-da inklyuziv yondashuvni taʼkidladi. Shuningdek, u OTB kabi xalqaro institutlar bilan hamkorlik qilish muhimligiga eʼtibor qaratdi.

Boshqaruvchilar kengashi yig‘ilishining yakunlari, ayniqsa, ishtirokchi mamlakatlar o‘rtasidagi ochiq va konstruktiv muloqot nuqtai nazaridan ahamiyatli bo‘ldi. Fikrlar turlicha bo‘lsa-da, iqlim tashabbuslarini moliyalashtirishni kuchaytirish bo‘yicha umumiy intilish mavjud. Iqlim o‘zgarishiga qarshi kurash Osiyo uchun ayniqsa dolzarb bo‘lib, O‘zbekiston qayta tiklanadigan energiyaga investitsiyalarni ko‘paytirish orqali muhim rol o‘ynashi mumkin. Bu yo‘nalish, yana-da raqamlashtirish va kengroq iqtisodiy rivojlanishga yordam beradi.

Samarqand boy tarix va yuksak madaniyatga ega shahar sifatida menda katta taassurot qoldirdi. Uning meʼmoriy merosini asrab-avaylash va ehtiyotkorlik bilan qayta tiklash ishlari alohida eʼtiborga loyiq. Bu jarayon shaharda anʼanalarga chuqur hurmat va kelajakka intilish uyg‘unligini yaqqol namoyon etadi.