DUSHANBE, 4-iyul. /“Dunyo” AA/. Tojikiston Milliy fanlar akademiyasi Falsafa, siyosatshunoslik va huquq instituti ilmiy xodimi Viktor Kim “Dunyo” AAga O‘zbekiston Prezidenti Shavkat Mirziyoyevning 2–3-iyul kunlari Gruziyaga amalga oshirgan davlat tashrifi yuzasidan fikr bildirdi:

– O‘zbekiston Prezidenti Shavkat Mirziyoyevning 2–3-iyul kunlari Gruziyaga amalga oshirgan davlat tashrifi ikki mamlakat munosabatlari tarixida muhim siyosiy voqea sifatida qayd etildi. Bu voqea natijalari nafaqat ikki tomonlama hamkorlikni mustahkamlash, balki uzoq muddatli istiqbolda O‘zbekiston–Gruziya aloqalarini Xitoy, Janubiy Osiyo va Yevropa bozorlarini bog‘lovchi muhim transkontinental iqtisodiy yo‘lakka aylantirish imkoniyatini yaratmoqda.

O‘zbekiston rahbarining Gruziyaga ilk davlat tashrifi ikki mamlakatning o‘zaro manfaatli hamkorlikni yangi bosqichga ko‘tarishga bo‘lgan qat’iy intilishini namoyon etdi. Ushbu tashrifni ikki davlat munosabatlarining kelgusi o‘n yilliklardagi rivojlanish yo‘nalishini belgilab beruvchi tarixiy qadam, deb baholash mumkin.

Bu jarayonning muhim asosi 2025-yil mart oyida Gruziya Bosh vaziri Irakliy Kobaxidzening O‘zbekistonga rasmiy tashrifi davomida yaratilgan edi. Agar o‘sha tashrif amaliy hamkorlik uchun mustahkam poydevor qo‘ygan bo‘lsa, Prezident Shavkat Mirziyoyevning davlat tashrifi mazkur munosabatlarni strategik sheriklik darajasiga ko‘tarishga xizmat qildi.

Mazkur voqeaga faqat ikki davlat o‘rtasidagi navbatdagi rasmiy uchrashuv sifatida emas, balki Markaziy Osiyoning geoiqtisodiy ahamiyatini oshirishga qaratilgan keng qamrovli strategiyaning muhim qismi sifatida qarash lozim. O‘zbekistonning Gruziya bilan hamkorligi Markaziy Osiyo mamlakatlari uchun Qora dengiz portlariga chiqish imkoniyatlarini kengaytiradi va mintaqani xalqaro dengiz savdosi tizimiga yanada chuqur integratsiyalashga xizmat qiladi.

Gruziya bu jarayonda alohida o‘rin tutadi. U Markaziy Osiyoni Yevropa bilan bog‘laydigan eng muhim transport va logistika markazlaridan biri hisoblanadi. Shuningdek, Gruziya Transkaspiy xalqaro transport yo‘lagi – “O‘rta yo‘lak”ning asosiy bo‘g‘ini sifatida xavfsiz, zamonaviy va samarali logistika infratuzilmasiga ega.

So‘nggi ikki yil ichida O‘zbekiston va Gruziya o‘rtasidagi munosabatlar jadal rivojlanib bormoqda. Bu jarayon iqtisodiyot, transport, savdo, investitsiyalar va sanoat kooperatsiyasi sohalarida yangi loyihalarni amalga oshirish uchun keng imkoniyatlar ochmoqda. Xususan, raqamli logistika tizimini joriy etish, hujjat aylanishini soddalashtirish, yuk tashish muddatini qisqartirish, shuningdek, eksport-import operatsiyalari uchun qulay tarif mexanizmlarini ishlab chiqish kabi tashabbuslar ikki mamlakat iqtisodiy hamkorligini yanada mustahkamlashi mumkin.

Tashrif doirasida Gruziya Prezidenti Mixail Kavelashvili tomonidan O‘zbekiston Prezidenti Shavkat Mirziyoyevga mamlakatlar o‘rtasidagi munosabatlarni rivojlantirishga qo‘shgan hissasi uchun Gruziyaning oliy davlat mukofoti – “Oltin mo‘yna” ordeni topshirilgani ham ikki davlat o‘rtasidagi yuksak ishonch va o‘zaro hurmatning yorqin ifodasi bo‘ldi.

Umuman olganda, mazkur davlat tashrifi O‘zbekiston va Gruziya o‘rtasidagi strategik sheriklik munosabatlarini sifat jihatidan yangi bosqichga olib chiqdi. Eng muhimi, u “Markaziy Osiyo – Janubiy Kavkaz” hamkorlik makonini shakllantirish, Yevroosiyoda yangi transport-logistika va geoiqtisodiy arxitekturani barpo etish yo‘lida muhim qadam bo‘lib xizmat qiladi.

Shu ma’noda, Prezident Shavkat Mirziyoyevning Gruziyaga davlat tashrifi nafaqat ikki mamlakat, balki butun mintaqa taraqqiyoti uchun strategik ahamiyatga ega tarixiy voqeadir.