PARIJ, 10-may. /“Dunyo” AA/. Mamlakatimizning Fransiyadagi elchixonasi ko‘magida O‘zbekiston “El-yurt umidi” jamg‘armasi ijrochi direktori Gulnoza Ismailovaning ushbu davlatga xizmat safari amalga oshirildi, deb xabar qilmoqda “Dunyo” AA muxbiri.

Mazkur tashrif doirasida O‘zbekiston va Fransiya o‘rtasida oliy ta’lim, ilm-fan hamda kadrlar tayyorlash sohasidagi hamkorlikni yanada kengaytirishga qaratilgan qator muhim uchrashuvlar o‘tkazildi.

Safar davomida Fransiyadagi ta’lim sohasida yetakchi hisoblangan “Campus France” agentligi bilan samarali muzokaralar olib borildi.

Shuningdek, Fransiyaning nufuzli oliy ta’lim muassasalari – Sciences Po, École Nationale de l’Aviation Civile (ENAC), HEC Paris, CESI École d’Ingénieurs hamda qator nufuzli universitet va ilmiy markazlar bilan hamkorlik istiqbollari muhokama qilindi.

Uchrashuvlarda tomonlar o‘zaro manfaatli hamkorlikni yangi bosqichga olib chiqish, ta’lim sifatini oshirish va xalqaro standartlarga mos kadrlar tayyorlash masalalariga alohida e’tibor qaratdi. O‘zbekistonlik talabalarning Fransiyaning nufuzli universitetlarida tahsil olish imkoniyatlari yuzasidan ham fikr almashildi.

Muzokaralar davomida ta’lim va ilmiy dasturlarni qo‘shma moliyalashtirish mexanizmlarini yo‘lga qo‘yish, qo‘shma ta’lim dasturlari va akademik almashinuvlarni rivojlantirish, shuningdek muhandislik, davlat boshqaruvi, aviatsiya, tibbiyot, sun’iy intellekt va madaniyat sohalarida amaliy hamkorlikni kengaytirish bo‘yicha kelishuvlarga erishildi.