ISLOMOBOD, 22-sentabr. /"Dunyo" AA/. Pokistonning ommabop ommaviy axborot vositalari O'zbekistonning giyohvandlik va jinoyatchilikka qarshi kurash sohasida Birlashgan Millatlar Tashkiloti bilan hamkorligi va natijalarni keng yoritdi, deb xabar qilyapti "Dunyo" AA muxbiri.

Jumladan, ushbu mamlakatning "Election Times" va "World News" onlayn platformalari hamda "Pakistan in the World" jurnalida "Birlashgan Millatlar Tashkiloti bilan hamkorlik doirasida giyohvandlik va jinoyatchilikka qarshi kurashish: asosiy natijalar va yutuqlar" sarlavhali maqolalar e'lon qilindi.

Nashrda qayd etilganidek, globallashuv sharoitida giyohvandlik vositalari, psixofaol moddalar va ularning prekursorlarining noqonuniy aylanishi insoniyat xavfsizligi va barqaror taraqqiyotiga jiddiy tahdid sifatida namoyon bo'lmoqda.

Birlashgan Millatlar Tashkilotining 2024 yilgi Jahon narkotiklar hisobotiga ko'ra , dunyo bo'ylab taxminan 300 million kishi (har 17 kishidan biri ) giyohvand moddalarni iste'mol qiladi. Ularning 60 milliondan ortig'i opioidlarga qaramlikdan aziyat chekmoqda.

Ayni paytda, sintetik giyohvand moddalarning tarqalishi tez sur'atlar bilan o'sib bormoqda, ayniqsa ularning internet orqali va kriptovalyutadan foydalanish orqali tarqatilishi . Bu jarayonni yana-da xavfli va deyarli nazorat qilib bo'lmaydigan holga keltiradi.

UNODC (Birlashgan Millatlar Tashkilotining Narkotiklar va jinoyatchilik bo'yicha boshqarmasi) giyohvand moddalarni nazorat qilish, jinoyatchilik va korrupsiyaga qarshi kurashish sohasida yetakchi xalqaro organ hisoblanadi.

"O'zbekistonning UNODC bilan hamkorligi uning 1993 yilda Toshkentda ochilgan va bugungi kunda ham o'z faoliyatini davom ettirayotgan Markaziy Osiyo mintaqaviy vakolatxonasi orqali amalga oshirilmoqda. Mazkur idora narkotik moddalarni suiiste'mol qilish va ularning noqonuniy aylanishiga, shuningdek, uyushgan jinoyatchilik, korrupsiya va terrorizmga qarshi kurashishda amaliy yordam ko'rsatmoqda", – deyiladi maqolalarda.

Yuqorida sanab o'tilgan tahdidlarning oldini olish maqsadida O'zbekistonda o'tgan yili ilk bor 2024-2028 yillarga mo'ljallangan Narkotiklar va giyohvandlik bilan bog'liq jinoyatlarga qarshi kurashish bo'yicha Milliy strategiya qabul qilingan edi. Ushbu Strategiyaning 30-bandida ham O'zbekiston va BMT Narkotiklar va jinoyatchilikka qarshi kurash boshqarmasi o'rtasidagi hamkorlik muhimligi qayd etilgan.

 Maqolalarda BMT Narkotiklarga qarshi kurashish boshqarmasi va Narkotiklarga qarshi kurashish xalqaro kengashi (INCB) bilan hamkorlikni mustahkamlash maqsadida O'zbekistonning Avstriyadagi elchixonasida birinchi kotib lavozimi joriy etilgani ma'lum qilingan. Ushbu tashabbus mamlakatning xalqaro forumlardagi ishtirokini va BMT bilan bog'liq tashabbuslarni tizimli ravishda ilgari surish qobiliyatini mustahkamlaydi.

"Bu borada O'zbekistonning BMTning Narkotik moddalar bo'yicha komissiyasi (CND) doirasidagi hamkorligini kengaytirish ustuvor vazifa hisoblanadi. CND BMTning giyohvand moddalarni nazorat qilish tizimidagi asosiy siyosatni ishlab chiqaruvchi organ hisoblanadi. Uning vazifalari qatoriga global vaziyatni muntazam ravishda tahlil qilish, giyohvandlikka qarshi kurash bo'yicha takliflar ishlab chiqish, nazorat tizimini mustahkamlash kiradi. O'zbekistonning Komissiyaga to'laqonli a'zo bo'lishi mamlakatga global qarorlarda ishtirok etish, hamkorlikni kengaytirish va xalqaro maydonda o'z tashabbuslarini ilgari surish imkonini beradi", – deb yozgan Pokiston OAV.

O'zbekiston ham BMT doirasida qabul qilingan xalqaro konvensiya va protokollarga qo'shildi va ularning ijrosini ta'minlash bo'yicha izchil chora-tadbirlar ko'rmoqda. Keyingi yillarda milliy qonunchilik zamon talablariga moslashtirildi, jinoyatchilikning yangi shakllariga qarshi huquqiy mexanizmlar mustahkamlandi.

UNODC bilan hamkorlik O'zbekiston Narkotik moddalarni nazorat qilish milliy axborot-tahlil markazi orqali amalga oshiriladi. Bundan tashqari, Markaziy Osiyo mintaqaviy xavfsizlikni ta'minlashda Giyohvandlik vositalari, psixotrop moddalar va ularning prekursorlarining noqonuniy aylanishiga qarshi kurashish bo'yicha Markaziy Osiyo mintaqaviy axborot-muvofiqlashtirish markazining o'ziga xos va hal qiluvchi rolini alohida ta'kidlash zarur.

Maqolalar xulosasida, "O'zbekiston BMT bilan hamkorlikda giyohvandlik va jinoyatchilikka qarshi kurashda katta natijalarga erishmoqda. Mamlakatda BMTning xalqaro dastur va mexanizmlari bilan integratsiyalashgan holda narkotik moddalar tarqalishiga qarshi samarali chora-tadbirlar amalga oshirilmoqda", – deb urg'ulangan.