OSTONA, 23-aprel. /"Dunyo" AA/. Aqto'be viloyati hokimining o'rinbosari Abzal Abdikarimov amaliy tashrif bilan O'zbekistonda bo'ldi, deb xabar qilmoqda "Dunyo" AA muxbiri.

Qozog'istonning "Karavan" elektron nashri ma'lumotiga ko'ra, Aqto'be viloyati hokimining o'rinbosari safar davomida Toshkent shahridagi "Texnopark" faoliyati bilan yaqindan tanishdi.

"Texnopark" MCHJ 2019-yilda tashkil etilgan. Uning umumiy maydoni 106,5 gektar bo'lib, shundan 50 gektar sanoat zonasi hisoblanadi. "Texnopark"da 5500 kishi ishlaydi. Ayni paytda jami 371,5 million AQSh dollari miqdoridagi investitsiyalar bo'yicha 21 ta loyiha amalga oshirilmoqda. Mahsulotlar ham ichki bozorga, ham eksportga yo'naltirilgan.

Bu yerda ishlab chiqarilgan mahsulotlar Qozog'iston, Rossiya, Ukraina, Ozarbayjon, Gruziya, Armaniston, Tojikiston, Qirg'iziston, Afg'oniston, Ruminiya va boshqa mamlakatlarga eksport qilinmoqda.

"Eslatib o'tamiz, o'tgan yili Aqto'be viloyati va O'zbekiston o'rtasidagi tovar ayirboshlash hajmi 52,4 million AQSh dollarini tashkil qilgan", – deyilgan "Karavan" manbasida.