ISTANBUL, 7 noyabr. /"Dunyo" AA/. Turkiyada og'ir vaziyatga tushib qolgan vatandoshlarimizga O'zbekiston Bosh konsulxonasi tomonidan zarur konsullik-huquqiy yordam ko'rsatildi, deb xabar bermoqda "Dunyo" AA muxbiri.

O'zbekiston diplomatlari Sakarya viloyatidagi jazoni ijro etish muassasasida bo'lib, bu yerda hibsda saqlanayotgan bir guruh fuqarolarimiz bilan suhbat uyushtirdi.

Bosh konsulxona xodimlari hamyurtlarimizga zarur huquqiy maslahatlar berib, sud jarayonlarida hamyurtlarimizni himoya qilayotgan advokatlar bilan fikr-mulohaza almashdi.

Giyohvandlik vositalari va psixotrop moddalarni saqlashda gumonlanib, 2024 yildan buyon Sakarya viloyatidagi jazoni ijro etish muassasasida saqlanib kelgan O'zbekiston fuqarosi F.A., joriy yilning 30 oktyabr kuni bo'lib o'tgan navbatdagi sud majlisi qaroriga ko'ra sud zalidan ozodlikka chiqarilgan.

Mamlakatimizning chet davlatlardagi konsullik idoralari tomonidan amalga oshirilayotgan bunday hayrli ishlar Yangi O'zbekistonning tashqi siyosatda ham o'z o'rniga egaligi, vatandoshlar manfaatlarini himoya qilish ustuvor ahamiyat kasb etishini tasdiqlaydi.

O'zbekistonning hech bir fuqarosi e'tiboran chetda qolmaydi va zarur hollarda Vataniga yetib olishi uchun barcha tegishli amallar bajariladi.