BRATISLAVA, 26-noyabr. /"Dunyo" AA/. Bratislava shahrida Slovakiya Mehnat, ijtimoiy masalalar va oila vazirligi hamda Xalqaro migratsiya tashkiloti (XMT) tomonidan tashkil etilgan "Barqaror mehnat migratsiyasi amaliy qadamlarda" konferensiyasi bo'lib o'tdi, deb xabar bermoqda "Dunyo" AA muxbiri.

Anjuman mehnat migratsiyasini ikki tomonlama boshqarish bo'yicha xalqaro tajriba va ilg'or tajribalarni namoyish etish, shuningdek, ushbu sohadagi siyosat, dasturlar va tendensiyalarni muhokama qilishga qaratilgan bo'lib, unda Slovakiya davlat organlari, mahalliy ish beruvchilar va kasaba uyushmalari vakillari, shuningdek, mehnat migratsiyasi bo'yicha mutaxassislar, diplomatik korpus va xalqaro tashkilotlar vakillari ishtirok etdi.

Tadbirning ochilish marosimida so'zga chiqqan Slovakiya vazirligining Xalqaro munosabatlar va Yevropa ishlari departamenti direktori Karol Yokl bugungi kunda mamlakat ayrim muhim sohalarda jiddiy ishchi kuchi tanqisligini boshdan kechirayotgani, bu esa xalqaro mehnat migratsiyasining yangi yo'llarini izlashni talab qilayotganini ta'kidladi. Shu maqsadda 2025 yil iyun oyida mamlakatning migratsiya bo'yicha yangi milliy strategiyasi qabul qilingani va mazkur hujjat mehnat bozorida talab yuqori bo'lgan mutaxassisliklarga ega bo'lgan YEIga a'zo bo'lmagan mamlakatlardan kelgan muhojirlar uchun imkoniyatlar yaratish va mavjud tartib-qoidalarni soddalashtirishga qaratilganini bildirdi.

XMTning submintaqaviy byurosi direktori Janluka Rokko o'z nutqida tashkilot barcha manfaatdor tomonlarga yordam berishga tayyorligini ma'lum qildi.

Konferensiyada O'zbekistonning Slovakiyadagi elchisi (qarorgohi Vena shahrida) Baxtiyor Ibragimov ham so'zga chiqib, ishtirokchilarga davlatimiz rahbari tomonidan O'zbekistonda tashqi mehnat migratsiyasi sohasini rivojlantirish borasida amalga oshirilayotgan islohotlar haqida batafsil ma'lumot berdi.

Slovakiya mehnat bozorida ishchi kuchi yetishmasligini hisobga olgan holda, O'zbekistondan mehnatga layoqatli va uyushgan ishchi kuchini qonuniy ravishda yuborishga qiziqish bildirildi.

Diplomat O'zbekiston tomoni mehnat migratsiyasi sohasida uzoq muddatli, barqaror va o'zaro manfaatli hamkorlikka tayyorligini ta'kidlab, ushbu yo'nalish nafaqat iqtisodiy samara, balki madaniy almashinuv va ikki xalq o'rtasidagi do'stlik rishtalarini mustahkamlashga hissa qo'shadigan muhim omil ekanligini qayd etdi.