TOSHKENT, 1-iyul. /"Dunyo" AA/. Toshkent shahrida "Umra plyus va ziyorat turizmi" ko'rgazmasi bo'lib o'tdi, deb xabar qilmoqda "Dunyo" AA muxbiri.

Yarmarka O'zbekistonning Saudiya Arabistonidagi elchixonasi ko'magida  yurtimizdagi Umra ziyoratlarini tashkil qiluvchi sayyohlik agentliklari tomonidan tashkil etildi.

Tadbir O'zbekistonga xorijiy sayyohlarni jalb qilish va turizm kompaniyalari tomonidan Umra ziyoratini tartibli amalga oshirish bo'yicha tajriba almashish maqsadida o'tkazildi.

Unda Saudiya Arabistoni aviakompaniyalari, katering, transport va xizmat ko'rsatuvchi korxonalari rahbarlari hamda MDH va qo'shni davlatlardan ushbu yo'nalishda ishlaydigan turkompaniyalar vakillari qatnashdi.

Ko'rgazma davomida Saudiya Arabistoni vakillari bilan Umra ziyoratlarini tartibli ravishda tashkil etish, sayyohlar almashinuvini oshirish istiqbollari yuzasidan fikr almashildi.

O'zbekiston va Saudiya Arabistoni vakillari o'rtasida bo'lib o'tgan muzokaralar natijasida bir qator muhim kelishuv va shartnomalar imzolandi.