САМАРҚАНД, 5 ноябрь. /"Дунё" АА/. Кеча Ўзбекистон ташқи ишлар вазирининг биринчи ўринбосари Бахромжон Аълоевнинг Кувайт таълим вазири Саййид Жалол ал-Табтабаий билан учрашуви бўлиб ўтди, деб хабар бермоқда "Дунё" АА мухбири.

ТИВ маълумотига кўра, юқори мартабали меҳмон Самарқанд шаҳрида ўтказилаётган ЮНEСКО Бош конференциясининг 43-сессияси самарали музокаралар ва манфаатли келишувларга бой бўлганини қайд этиб, яратилган имкониятлар учун Ўзбекистонга чексиз миннатдорлик билдирди.

Вазир Ўзбекистон Президентининг жорий йил февраль ойида Кувайтга амалга оширган расмий ташрифига алоҳида тўхталиб, икки давлат раҳбарлари ўртасида ўтказилган олий даражадаги мулоқот ўзаро муносабатлар тарихида янги саҳифа очганини таъкидлади.

Суҳбат давомида маданият, таълим, илм-фан ва рақамли технологиялар йўналишларида ҳамкорлик истиқболлари атрофлича муҳокама қилинди ҳамда Ўзбекистоннинг ислом цивилизациясига қўшган бой маданий меросини биргаликда ўрганиш масалалари юзасидан фикр алмашилди.

"Дунё" АА олган сурат