ТОШКЕНТ, 2 ноябрь. /"Дунё" АА/. Ўзбекистон Президентининг Афғонистон бўйича Махсус вакили Исматулла Иргашев кеча Европа Иттифоқининг Марказий Осиё бўйича махсус вакили Терхи Хакала билан учрашди, деб хабар қиляпти "Дунё" АА мухбири.

ТИВ маълумотига кўра, суҳбат чоғида Афғонистондаги Ўзбекистон-Европа муносабатларининг бугунги ҳолати ва истиқболлари, халқаро ҳамжамиятнинг мамлакатда гуманитар инқирознинг олдини олиш борасидаги саъй-ҳаракатлари ҳамда Термиз шаҳридаги халқаро транспорт-логистика хабдан Афғонистонга инсонпарварлик ёрдами учун турли юкларни етказиб беришда фойдаланиш имкониятлари муҳокама қилинди.

Терхи Хакала Ўзбекистоннинг Афғонистон бўйича минтақавий позицияни мустаҳкамлаш, мамлакатда узоқ муддатли тинчлик ва барқарорликни ўрнатиш борасидаги саъй-ҳаракатларини юқори баҳолади.

Томонлар афғон масалалари бўйича икки томонлама маслаҳатлашувларни давом эттиришдан ўзаро манфаатдор эканликларини билдирдилар.

"Дунё" АА олган сурат