ФРАНКФУРТ-МАЙН, 23 июнь. /"Дунё" АА/. Германиянинг "Deutsche Allgemeine Zeitung" газетасида Тошкентда Ўзбекистонда яшайдиган немислар масаласи бўйича Ўзбекистон-Германия ҳукуматлараро комиссиясининг 15-мажлиси бўлиб ўтганига бағишланган мақола эълон қилинди, деб хабар қилмоқда "Дунё" АА мухбири.

"Федерал ҳукуматнинг этник немислар ва миллий озчиликлар бўйича комиссари доктор Бернд Фабрициус ва Ўзбекистон Миллатлараро муносабатлар ва хориждаги ватандошлар масалалари бўйича қўмитаси раиси Қаҳрамон Сариев ҳамраислигида бўлиб ўтган мажлисда 4000 дан ортиқ немисларни қўллаб-қувватлаш дастури ва икки давла ўртасидаги ҳамкорлик истиқболлари муҳокама қилинди", – деб ёзилган мақола аввалида.

Нашрда маълум қилинишича, германиялик ва ўзбекистонлик иштирокчиларнинг вакиллик таркиби икки давлат ўртасидаги узоқ муддатли муносабатларнинг ҳолати ва истиқболларини муҳокама қилиш, фаолиятнинг турли йўналишлари бўйича қизғин фикр алмашиш имконини берди.

Немис газетаси бугунги кунда Ўзбекистондаги 980 та мактабда 3000 дан ортиқ ўқитувчи немис тилидан дарс бераётгани хабар қилган. "Бу нафақат этник немислар орасида, балки республика аҳолиси орасида немис тилига катта қизиқиш борлигини яна бир бор кўрсатади. Шу билан бирга, Ўзбекистон ҳукумати барча этник гуруҳларга катта ҳурмат билан муносабатда бўлиб, миллатлараро ва динлараро бағрикенгликни юксак даражада намоён этмоқда", – дея урғуланган материалда.

Таъкидланишича, йиғилишда Ўзбекистон немислари маданият маркази раиси Елена Миронова мажлисдаги нутқида, марказнинг 30 йиллик тарихида ҳеч қачон бунчалик кўп ранг-баранг, энг аввало, оммабоп лойиҳалар бўлмаганини билдирди.

Мақола якунида "Ҳукумат комиссияси мажлиси якунлари бўйича Ўзбекистонда истиқомат қилаётган немисларнинг этник-маданий ўзига хослигини янада тарғиб қилиш ва ривожлантириш бўйича умумий ёндашувлар ишлаб чиқилган коммюникенинг тантанали имзоланиши бўлиб ўтди", – деб ёзилган.