МОСКВА, 3 октябрь. /«Дунё» АА/. «РИА Новости» ахборот агентлиги томонидан «Бухоронинг сайёҳлик жозибадорлиги» сарлавҳали мақола тарқатилди, деб хабар бермоқда «Дунё» АА мухбири.

«Кўҳна Бухорода яқин кунларда Самарқанддаги «Боқий шаҳар»га ўхшаш тарихий-этнографик боғ барпо этиш режалаштирилган, - дейилади мақолада. - Бугунги кунда Бухоро вилоятида 183 та сайёҳлик объекти мавжуд бўлиб, уларнинг 132 таси тарихий ва маданий обидалар, 21 таси экология ва қишлоқ хўжалиги марказлари, 14 та ҳунармандчилик марказлари, тўртта вино дегустациялари масканларидир».

«РИА Новости»да Бухоро шаҳрида ҳар йили «Ипак ва зираворлар», «Зардўзлик ва заргарлик буюмлари» каби фестиваллар ўтказилиши ҳамда гастрономик туризм кенг ривожланаётгани маълум қилинди.

«Эски шаҳардаги деярли барча ресторанларда миллий таомлар сайёҳларга таклиф қилинади, – дейилади мақолада. – Бухорода кўпайиб бораётган россиялик сайёҳлар илтимосига кўра, меҳмонхоналар нафақат нонушта, балки созандалар, хонандалар ва раққосаларнинг чиқишлари ҳам уюштирмоқда».

Агентлик, шунингдек, жорий йилнинг ўзида Бухорода 15 та янги маҳаллий сайёҳлик ташкилоти очилгани, гидлар сони айни пайтда уч юздан кўпроқни ташкил этишини қайд этган.

«Сиз Россиянинг бир қанча шаҳарларидан, жумладан, Москва, Нижний Новгород, Қозондан тўғридан-тўғри рейслар орқали Бухорога учишингиз мумкин. Чипта нархи бир томонга ўртача 13 минг рублни ташкил қилади, чегирмалар ҳам мавжуд», – деб ёзган «РИА Новости» томонидан эълон қилинган мақола интиҳосида.