ТОШКЕНТ, 26 сентябрь. "Дунё" АА/. Москвада ўтаётган Жаҳон атом ҳафталиги доирасида Ўзбекистон ва Россия ўртасида иккита стратегик муҳим битимлар имзоланди, деб хабар қилмоқда "Дунё" АА мухбири.

"Ўзатом" агентлиги telegram-канали маълумотига кўра, биринчи ҳужжат – "Росатом Энергетика лойиҳалари" АЖ ва "АЭС қурилиши дирекцияси" давлат корхонаси ўртасида 2025 йил 20 июндаги Битимга Ўзбекистонда интеграциялашган Атом электр станциясини қуриш лойиҳасини амалга оширишнинг асосий шартлари тўғрисидаги қўшимча битим.

Ҳужжат 3+ авлоддаги 2 та ВВЕР-1000 реакторлари ва 2 та РИТМ-200Н реакторлари негизида кичик ва катта қувватли атом станцияларидан иборат интеграциялашган АЭС қурилиши лойиҳасининг конфигурациясини белгилайди.

Иккинчи ҳужжат – "Росатом Энергетика лойиҳалари" АЖ ва "АЭС қурилиши дирекцияси" давлат корхонаси ўртасида Ўзбекистонда кичик қувватли атом электр станцияси ва катта қувватли атом электр станцияси учун ядро ёқилғисини етказиб бериш бўйича шартномаларнинг асосий шартлари тўғрисидаги битим.

Битим имзоловчилар ўртасида РИТМ-200Н ва ВВЕР-1000 реактор қурилмалари учун ядро ёқилғиси, шунингдек, эҳтиёт қисмлар, монтаж ва назорат ускуналарини етказиб бериш бўйича асосий келишувларни мустаҳкамлайди.

"Ўзбекистоннинг қоқ марказида, Жиззах вилоятида биз мисли кўрилмаган энергетика лойиҳасини яратмоқдамиз. Марказий Осиёда атом энергетикасини ривожлантиришда пешқадам бўлиб, биз нафақат минтақада биринчи станцияни қуряпмиз, балки биринчи бўлиб келажакнинг инновацион ечимини яратяпмиз. Бизнинг лойиҳамиз – бу кичик модулли станцияларнинг илғор технологиялари ва катта қувватли классик атом энергетикасининг вақт синовидан ўтган ечимларининг дадил бирикмасидир", – деди "Ўзатом" агентлиги директори Азим Ахмедхаджаев.

"Бугун имзоланган битимлар "Росатом" ва Ўзбекистон ўртасида тинч атом соҳасида муносабатларни ривожлантиришда янги босқич бошланганидан далолат беради. Эришилган келишувлар туфайли Ўзбекистон бир вақтнинг ўзида ҳам кичик қувватли замонавий атом станцияси, ҳам катта қувватли атом электр станцияси ишлайдиган интеграциялашган атом электр станциясини қурадиган дунёдаги биринчи мамлакат бўлади", – деди Алексей Лихачёв.