ТЕҲРОН, 12 июнь /"Дунё" АА/. "Ala Tejarat Mahad Qabous" компанияси бошқаруви раиси Сулаймон Хивечи "Дунё" АА учун интервьюсида Словакия Бош вазири Роберт Фицонинг 8-10 июнь кунлари Ўзбекистонга амалга ошираётган ташрифи ҳақидаги фикрларини билдирди:

– Сўнгги йилларда Ўзбекистон билан Словакия ўртасидаги муносабатлар икки томонлама ва кўп томонлама шаклларда жадал кенгайиб бораётгани ҳамда стратегик шериклик мақомини олаётганига гувоҳ бўлдик.

Хусусан, Тошкент шаҳрида бўлиб ўтган музокаралар якунида Ўзбекистон Президенти Шавкат Мирзиёев ва Словакия Бош вазири Роберт Фицо Стратегик шериклик муносабатларини ўрнатиш тўғрисидаги қўшма декларацияни имзоладилар.

Бугунги кунга қадар икки давлат ўртасида амалга оширилган ўзаро ташрифлар натижалари Ўзбекистон-Словакия ҳамкорлигини янада ривожлантириш, Тошкент ва Братислава ўртасидаги кенг сиёсий мулоқот ва жамоатчилик билан алоқаларни чуқурлаштиришни таъминлади.

Бундан ташқари, икки давлат ўртасида савдо-иқтисодий ва сармоявий ҳамкорлик изчил ошиб бораётганини кўрмоқдамиз, май ойида Ҳукуматлараро комиссиянинг биринчи йиғилиши самарали ўтказилди. Кооперациянинг қатор янги йўналишлари ва лойиҳалари устида иш олиб борилмоқда.

Ишончим комилки, Ўзбекистон ва Словакия икки томонлама савдо-иқтисодий ҳамкорликни янада кенгайтириш учун янада кенг имкониятлар ва салоҳиятга эга.

Шу билан бирга, устувор лойиҳаларни молиялаштириш қўшма жамғармасини ташкил этиш орқали муҳим инвестиция лойиҳаларини биргаликда амалга ошириш масаласига томонлар юқори қизиқиш билдирмоқда.

Словакиянинг етакчи компаниялари билан агросаноат мажмуаси, автомобиль бутловчи қисмларини маҳаллийлаштириш, фармацевтика маҳсулотлари ишлаб чиқариш, шунингдек, яшил энергетика ва туризм соҳасидаги лойиҳалар бўйича тўлиқ кўламли саноат кооперацияси дастурини тайёрлаш бўйича келишувга эришилди.

Президент Шавкат Мирзиёев ўзаро муносабатларнинг эришилган даражасида тўхтамасдан, кўп қиррали Ўзбекистон-Словакия ҳамкорлигини янада кенгайтириш учун ҳали фойдаланилмаган салоҳиятдан самарали фойдаланиш бўйича амалий чора-тадбирларни амалга оширишда давом этмоқда.