МАДРИД, 28 июнь. /"Дунё" АА/. Сан-Пабло университети Ижтимоий тадқиқотлар институти профессори, Марказий Осиё минтақаси бўйича эксперт Антонио Алонсо (Испания) "Дунё" АА учун интервьюсида Ўзбекистон Президенти Шавкат Мирзиёевнинг 27 июнь куни Минск шаҳрида бўлиб ўтган Олий Евроосиё иқтисодий кенгашининг (ЕОИК) навбатдаги йиғилишидаги иштироки ҳақидаги фикрларини билдирди:

– Ўзбекистон Президенти узоқни кўра оладиган, стратегик фикрлайдиган, нафақат долзарб муаммоларни тез илғайдиган, балки минтақавий ва халқаро миқёсда барқарор ривожланиш механизмларини таклиф эта оладиган етакчи тимсолини шакллантиришда давом этмоқда. Унинг Минск шаҳрида бўлиб ўтган Олий Евроосиё иқтисодий кенгашининг навбатдаги йиғилишида иштирок этиши, ўтган йиллардагидек, кузатувчи давлат мақоми давом этаётганига қарамай, Ўзбекистоннинг Евроосиё иқтисодий иттифоқи (ЕОИИ) билан ҳамкорликни кенгайтириш ва чуқурлаштириш борасидаги изчил йўналишидан далолат беради.

Эътиборлиси, кузатувчи формати доирасида Ўзбекистон ҳозирданоқ фаол интеграция сиёсатини амалга оширмоқда. Мамлакатингиз етакчиси ЕОИИ давлатлари билан ҳамкорликнинг савдо ва саноатдан тортиб, рақамлаштириш ва агросаноат соҳасигача бўлган 20 дан ортиқ йўналишларини қамраб олган ташаббусларни илгари сурди. Бундай ёндашув кенг қамровли бўлиб, нафақат Ўзбекистон манфаатларига хизмат қилади, балки Иттифоқнинг ўзининг стратегик устувор йўналишлари – саноат кооперациясини чуқурлаштириш, технологик суверенитетни таъминлаш ва минтақанинг барқарор ривожланишига ҳам жавоб беради.

Айниқса, Президент Шавкат Мирзиёевнинг Ўзбекистонни Евроосиё тараққиёт банкига аъзо бўлиш тўғрисида қабул қилган қарори сиёсий ва иқтисодий жиҳатдан эътиборга молик. Бу шунчаки рамзий қадам эмас, балки узоқ муддатли инвестиция лойиҳаларини амалга оширишдан манфаатдор ишончли ва башорат қилинадиган ҳамкор сифатида мамлакатимизнинг Евроосиё маконидаги мавқеини мустаҳкамлаш ниятидан далолатдир.

Ўзбекистон рақамли темир йўл транспорти, иқлим кун тартиби ва трансчегаравий электрон тижорат бўйича ЕОИИнинг пилот лойиҳаларида иштирок этаётгани аҳамиятлидир. Булар Евроосиё иқтисодий маконининг келажакдаги архитектураси учун асосдир.

Президент Шавкат Мирзиёев, шубҳасиз, буни нафақат техник ҳамкорлик, балки барқарор ўсишни таъминлаш, жадал технологиялар алмашинуви ва инклюзив ривожланиш воситаси сифатида кўради.

Ўзаро савдога тўсиқларни бартараф этиш, шунингдек, ЕОИИ мамлакатлари фуқароларининг ички ҳужжатлардан фойдаланган ҳолда Ўзбекистонга паспортсиз кириш имкониятини жорий этиш ташаббуси ҳам қизиқиш уйғотмоқда. Бу нафақат мамлакатлар ўртасидаги ўзаро ҳамкорликни соддалаштириш, балки гуманитар ва маданий соҳаларда ҳам босқичма-босқич яқинлашишга қаратилган дадил қадамдир.

Шунингдек, давлатингиз раҳбари раҳнамолигида интеграцияга тизимли ва институционал ёндашувни намойиш қилувчи ЕОИК билан ўзаро ҳамкорликни мувофиқлаштириш бўйича идоралараро ишчи гуруҳи тузилганини ҳам алоҳида таъкидлаш лозим. Бу модель бошқа кузатувчи давлатлар учун намуна бўлиб, белгиланган мақсадларни самарали амалга ошириш имконини беради.

Бошқача айтганда, Ўзбекистон Президентининг ЕОИИга нисбатан сиёсати – бу суверенитетни ҳурмат қилиш, жараённинг барча иштирокчилари манфаатларини ҳисобга олиш ва Евроосиёда барқарор ривожланишнинг умумий архитектурасини шакллантириш истагига асосланган очиқ, прагматик, ўзаро манфаатли ҳамкорлик сиёсатидир. Унинг ҳаракатлари минтақа давлатлари ўртасидаги ишончни мустаҳкамлайди ва интеграция жараёнларига янги суръат бағишлайди.