ГУАНЧЖОУ, 22 май. /"Дунё" АА/. "Nansha Economic Cooperation Association" ижрочи раиси Цуан Чжуян "Дунё" АА учун интервьюсида Ўзбекистон Президенти Шавкат Мирзиёевнинг 21 май куни Венгрия пойтахти Будапешт шаҳрида бўлиб ўтган Туркий давлатлар ташкилоти норасмий саммитидаги иштироки ҳақидаги фикрларини билдирди:

– Ўзбекистон Президенти Шавкат Мирзиёевнинг Туркий давлатлар ташкилотининг Будапештда бўлиб ўтган норасмий саммитидаги иштироки халқаро ҳамжамият томонидан юқори баҳоланди.

Унинг туркий дунё доирасидаги ҳамкорликни чуқурлаштиришда стратегик аҳамиятга эга бўлган иқтисодий, маданий ташаббусларни, шунингдек, глобал ва минтақавий хавфсизлик масалаларини илгари суришдаги ролини алоҳида қайд этишни истардим.

Минтақавий иқтисодий интеграцияни чуқурлаштириш шароитида ўзаро савдо улушини ошириш, жумладан, савдо тартиб-таомилларини соддалаштириш, божхона стандартларини уйғунлаштириш ва "яшил" технологияларни ривожлантириш учун "Турк-траде" ягона онлайн-платформасини яратишга алоҳида эътибор қаратилди.

Мамлакатингиз етакчиси , шунингдек, Туркий инвестиция фондининг сармоя оқимини фаоллаштиришдаги ролини кучайтириш, иқтисодиётнинг муҳим тармоқларида янги йирик ишлаб чиқариш қувватларини яратиш учун саноат кооперацияси соҳасидаги ҳамкорлик муҳимлигини таъкидлади.

Транспорт йўлакларини диверсификация қилиш, хусусан, Транскаспий халқаро йўлаги бўйлаб юк ташиш ҳажмини ошириш бўйича лойиҳаларни илгари суриш муҳимлиги ҳам алоҳида қайд этилди. Улар эса минтақанинг глобал таъминот занжиридаги ролини мустаҳкамлайди. Ўзбекистон Президентининг ТДТ саммитидаги нутқида илгари сурилган ташаббуслар кенг қамровли ва прагматик бўлиб, минтақадаги интеграция жараёнларининг ҳаракатлантирувчи кучига айланишига хизмат қилади.