ИСЛОМОБОД, 30 май. /"Дунё" АА/. Миллий мулоқот форуми таҳлилий маркази ижрочи директори Шахриёр Хон (Покистон) "Дунё" АА учун интервьюсида Италия Бош вазири Жоржа Мелонининг 28-29 май кунлари Ўзбекистонга буюрган ташрифи ҳақидаги фикрларини баён қилди.

– Италия Бош вазири Жоржа Мелонининг Ўзбекистонга расмий ташрифи ва Президент Шавкат Мирзиёев билан Самарқандда ўтказган музокараларини катта қизиқиш билан кузатдим. Ташриф нафақат икки томонлама алоқаларни мустаҳкамлашга қаратилган сиёсий ироданинг ифодаси, балки Ўзбекистоннинг Евроосиё савдо, технологик алмашинув ва барқарор ривожланиш тизимидаги стратегик аҳамияти ортиб бораётганининг кўзгуси бўлди.

Аввало, Бош вазир Жоржа Мелонининг Марказий Осиёга биринчи ташрифи учун Ўзбекистон танланишининг ўзи дипломатик ишора эканлигини таъкидламоқчиман. Италия нафақат иқтисодий ҳамкор, балки минтақавий жараёнларнинг иштирокчиси бўлишга қизиқиш билдирмоқда.

Стратегик шерикликни мустаҳкамлаш тўғрисидаги қўшма декларация ва кенг кўламли соҳаларни ўз ичига олган аниқ келишувлар тўпламининг имзолангани томонлар ниятлари қанчалик жиддий эканининг ишончли далилидир. Бу икки давлат амалий мазмунга асосланган барқарор ҳамкорлик архитектурасини барпо этишга интилаётганидан далолат беради.

Ўзбекистонда технологик шериклик ва инновацион ишлаб чиқаришни маҳаллийлаштириш бўйича музокараларда алоҳида эътибор қаратилаётганига алоҳида эътибор қаратмоқчиман.

Бундан ташқари, ташриф муҳим геоиқтисодий аҳамиятга эга. ЕИнинг барқарор таъминот йўналишлари ва муҳим ресурсларга қизиқиши ортиб бораётган бир шароитда Ўзбекистон нафақат логистика марказини, балки узоқ муддатли ҳамкорлик учун сиёсий барқарор платформани ҳам таклиф этади.

Умуман олганда, Италия Бош вазирининг Самарқандга ташрифи замонавий дипломатия нафақат сиёсат, балки энг аввало иқтисодиёт, технология, фан ва маданият эканлигининг ёрқин далили бўлди. Ўзбекистон бу жараёнда ишончли ҳамкор сифатида ҳаракат қилмоқда. Бу ташриф нафақат Ўзбекистон билан Италия, балки Марказий Осиё ва бутун Европа Иттифоқи ўртасидаги алоқаларни янада чуқурлаштириш учун янги туртки бўлади.