БУДАПЕШТ, 19 октябрь. /“Дунё” АА/. К.Эстерхази номидаги Католик университетининг Британия ва Америка тадқиқотлари институти катта илмий ходими Золтан Петереч “Дунё” ААга берган интервьюсида АҚШ давлат котиби Марко Рубионинг Ўзбекистонга бўлажак амалий ташрифи ҳақида фикр билдирди:

– АҚШ давлат котиби Марко Рубионинг Америка ишбилармон доираларининг нуфузли делегацияси ҳамроҳлигида Ўзбекистонга келиши Вашингтоннинг Ўзбекистон билан стратегик шерикликни янада мустаҳкамлашга интилиши, инвестиция ва савдо-иқтисодий ҳамкорликни кенгайтиришдан манфаатдорлигидан далолат беради.

Ташрифда юз нафардан ортиқ Америка компаниялари вакилларининг иштирок этиши икки томонлама кун тартибининг иқтисодий жиҳатига алоҳида аҳамият бағишлайди. Америка–Ўзбекистон ишбилармонлик ва инвестиция кенгаши йиғилишининг ўтказилиши ҳамда қатор ҳужжатларнинг имзоланиши амалий ҳамкорликни ривожлантириш, қўшма лойиҳаларни амалга ошириш ва мамлакат иқтисодиётининг турли тармоқларига АҚШ инвестицияларини жалб этиш учун қўшимча шароитлар яратиши мумкин.

Шу билан бирга, ташрифнинг стратегик аҳамияти икки томонлама иқтисодий масалалар билан чекланиб қолмайди. Шу нуқтаи назардан, Марказий Осиё минтақавий барқарорликни таъминлаш, транспорт-логистика алоқаларини ривожлантириш, савдо йўналишларини диверсификация қилиш ва минтақа мамлакатлари билан сиёсий мулоқотни кенгайтириш борасида АҚШда катта қизиқиш уйғотмоқда.

Ташриф доирасида “C5+1” форматидаги вазирлар учрашувининг ўтказилиши ҳам минтақавий масалаларни кўп томонлама асосда муҳокама қилишга бўлган интилишни кўрсатади. Ушбу формат АҚШ ва Ўзбекистон ўртасидаги икки томонлама муносабатларни ривожлантириш билан бир қаторда, хавфсизлик, иқтисодий ўзаро боғлиқлик, энергетика ва барқарор ривожланиш масалаларини кенгроқ минтақавий кўламда кўриб чиқиш имконини беради.

Марко Рубионинг бўлажак ташрифини Ўзбекистон–АҚШ стратегик шериклигини янада мустаҳкамлаш, савдо-инвестициявий алоқаларни кенгайтириш ҳамда долзарб минтақавий ва халқаро масалалар бўйича ҳамкорликни чуқурлаштириш учун муҳим имконият сифатида баҳолаш мумкин.