ТОКИО, 6 июль. /"Дунё" АА/. Токио университети доценти, ривожланаётган мамлакатлар, хусусан, Ўзбекистон бўйича етакчи тадқиқотчи профессор Масато Хиватари "Дунё" АА учун интервьюсида Ўзбекистон Президентининг 30 июнь – Ёшлар куни муносабати билан мамлакатимизнинг иқтидорли ёшлари билан ўтказган учрашуви ҳақидаги фикрларини баён қилди:

– Ривожланаётган мамлакатларда жамият тараққиёти, миграция, инновация сиёсати ва атроф-муҳит муаммолари йўналишларининг тадқиқотчиси сифатида Ўзбекистондаги ўзгаришларни ўрганиш доим илмий изланишларим марказида бўлган. Хусусан, Ўзбекистоннинг ёшларга оид сиёсатини кузатиш мен учун жуда қизиқарли. Президент Шавкат Мирзиёев 30 июнь – Ёшлар кунига бағишлаб ўтказилган тантаналарда юртингиз ёшлари билан самимий мулоқот қилди. Учрашувда давлат раҳбари томонидан илгари сурилган ташаббуслар эътироф этилиши, керак деб ўйлайман.

Таъкидлаш керакки, ҳар йили 3000 нафар иқтидорли ўзбек ёшларни дунёдаги етакчи олий таълим муассасаларида ўқиш учун юборилмоқда. Бу мамлакатингиз ёшларини глобал рақобатбардошлигини оширишга катта туртки берувчи омилдир. 2024 йилда Ўзбекистон ёшлари "ТОП-500"талик олийгоҳларга кириш бўйича Марказий Осиёда 1-ўринни эгаллаган. Ҳозирда 30 нафар ёшлар "ТОП-10", 500 нафари "ТОП-100" ва 1500 нафари "ТОП-300" университетларда хусусан, Япониянинг ўзида ҳам таҳсил олаётгани гапимнинг исботи ва бу мамлакат раҳбариятининг саъй-ҳаракатлари мевасидир.

Бу йўналишда мамлакатларимизнинг узоқ йиллик яқин дўстона муносабатларини давом эттириш муҳим аҳамият касб этади. Икки халқ манфаати йўлида ёшлар салоҳиятидан фойдаланиш учун катта салоҳият мавжуд.

Яқинда Токио университети ва Ўзбекистон олий таълим муассасалари ўртасида академик алоқаларни ўрнатиш бўйича илк қадамлар қўйилди. Бу икки мамлакат ёшларига ўз салоҳиятларини намоён этиш учун ажойиб имконият яратади. 

Шунингдек, жорий йил июнь ойида тажрибали ўзбек дипломати, иқтисодчи, профессор Бахтиёр Исломов Токио университетида бўлди ва Ўзбекистоннинг ёшларга оид давлат сиёсатининг самарали натижалари ҳақида маъруза қилди.

Мен янги тадқиқот лойиҳаларимда ўзбекистонлик ёш тадқиқотчиларни жалб қилишга ҳаракат қиламан. Чунки, улар билан ишлаш, уларнинг илмий изланишларга бўлган масъулияти, интизом ва муносабати менга маъқул. Ўзбекистонлик тадқиқотларга илмий раҳбарлик қилишим орқали уларнинг магистрлик ва докторлик даражасига эга бўлишларини кўриш мен учун шараф. Мен ўзбек ёшларининг илмий ривожига ўз ҳиссамни қўшишда давом этаман.

Ушбу саъй-ҳаракатлар икки томонлама илмий алмашинувни кучайтиришга хизмат қилишига ишонаман. Биз бу ва бошқа йўналишларда стратегик шерикликни янада мустаҳкамлаш ҳамда аниқ натижаларга эришиш тарафдоримиз.