АНҚАРА, 20 октябрь. /“Дунё” АА/. Анқара университети Ўзбек тилшунослиги кафедраси профессори Айнур Ўз Ўзжан “Дунё” ААга берган интервьюсида халқимизни 21 октябрь – Ўзбек тили байрами куни билан самимий қутлади.

– 2019 йилда Ўзбекистонга келганимда кўп нарсадан ҳайратланганман. Ўша сафар давомида ўзбек тилига давлат тили мақоми берилганининг 30 йиллигига бағишланган тадбирларда қатнашдим. Ўтган давр мобайнида Давлат тилини ривожлантириш департаменти, Ўзбек тилини ривожлантириш жамғармаси ҳамда Давлат тилида иш юритиш асосларини ўқитиш ва малака ошириш маркази ташкил этилди. Буларнинг барчаси мамлакат ўзбек тилини ривожлантириш ва ижтимоий ҳаётнинг барча жабҳаларида унинг қўлланиш доирасини кенгайтиришга қатъий бел боғлаганидан далолат беради.

Мазкур йўналишдаги ташкилотлар бугунги кунда фаол ва самарали иш олиб бормоқда. Китоблар нашр этилмоқда, илмий симпозиумлар ташкил этилмоқда. Ўтган йили мен ҳам шундай тадбирлардан бирида қатнашдим. Анъанага айланган бундай анжуманлар ўзбек тилини ривожлантириш ҳамда лингвистика ва тилшунослик соҳасидаги илмий ҳамкорликни мустаҳкамлашга салмоқли ҳисса қўшмоқда.

Ўзбекистон Президенти Шавкат Мирзиёевнинг БМТ Бош Ассамблеяси минбаридан туриб ўзбек тилида нутқ сўзлагани сўнгги йилларда ўзбек тилининг нуфузи ва унга бўлган талаб ортиб бораётганидан далолат беради. Бу она тилига, ўзбек халқига бўлган ҳурмат ва муҳаббат намунасидир. Бунинг мен учун алоҳида аҳамияти бор.

2020 йилда Ўзбек тили байрами куни таъсис этилди. Мен буни тилнинг мақоми ва аҳамияти юксалиб бораётганини тасдиқловчи энг муҳим воқеалардан бири деб биламан.

Эътиборимни тортган яна бир муҳим омил – давлат ишларининг ўзбек тилида юритилаётганидир. Бунинг учун тегишли китоблар ва луғатлар тайёрланди. Бундан ташқари, фуқаролар давлат тилидан фойдаланишга рағбатлантирилмоқда.

Буларнинг барчаси нафақат ўзбек тилининг ривожланиши, балки туркий тилларнинг бутун дунёда қўлланиш доирасини кенгайтиришда ҳам алоҳида аҳамият касб этади.