МАДРИД, 14 январь. /«Дунё» АА/. Ўзбекистон элчиси Фаррух Турсунов Испаниянинг «Ingeser» компанияси раҳбари Игнасио Дусмет билан учрашув ўтказди, деб хабар бермоқда «Дунё» АА мухбири.

Унда мамлакатимизга тўғридан-тўғри хорижий инвестициялар ва илғор технологияларни жалб этиш масалалари муҳокама қилинди.

Игнасио Дусметнинг айтишича, «Ingeser» Испаниянинг 45 йилдан ортиқ тажрибага эга етакчи муҳандислик компанияси ҳисобланади.

«Компания шаҳарсозлик, озиқ-овқат, фармацевтика ва логистика, архитектура, кимё ва «яшил» энергия соҳаларида дизайн билан шуғулланади, деди у. - Бугунги кунга қадар компания ишлаб чиқариш ва бошқарув жараёнига рақамлаштиришни жорий этиш орқали самарали ечимларни ишлаб чиқиш ва мувофиқлаштириш бўйича дунё бўйлаб 3 мингдан ортиқ лойиҳаларни амалга оширган».

Испания томони, шунингдек, компаниянинг Ўзбекистонда амалга оширилаётган инвестиция лойиҳаларда иштирок этишига қизиқишини тасдиқлади.