ДОХА, 28 февраль. /"Дунё" АА/. Ўзбекистон элчиси Ашраф Ходжаев "Power International Holding" компанияси бош ижрочи директори ўринбосари Морис Гаттас билан музокаралар ўтказди, деб хабар бермоқда "Дунё" АА мухбири.

Учрашувда Ўзбекистонда иқтисодиётнинг турли соҳаларида инвестиция лойиҳаларини амалга ошириш масалалари муҳокама қилинди.

"Power International Holding" компанияси 1983 йилда ташкил этилган бўлиб, дунёнинг 19 та мамлакатида фаолият олиб боради. "Forbes" нашрига кўра, Яқин Шарқдаги энг йирик компаниялардан бири ҳисобланади. Компания 5 та шўъба корхоналари орқали энергетика ва металлургия, соғлиқни сақлаш ва туризм, қишлоқ хўжалиги, меҳмонхона мажмуаларини қуриш каби соҳаларда лойиҳаларни амалга оширади: Компания ишчилари сони 65 мингдан ортиқ, амалга оширган лойиҳалари — 1100 та, Қатар озиқ-овқат саноатидаги улуши — 70 фоиз, 7 та дам олиш масканлари, 7 та меҳмонхоналар, 90 та ресторанлар, 8 та кўнгилочар мажмуалари ҳамда 4 та шифохоналарга эгалик қилади.

Музокаралар якунида "Power International Holding" компанияси томонидан Ўзбекистонда инвестиция лойиҳалари билан боғлиқ тегишли ўрганиш ишларини олиб бориш мақсадида Mорис Гаттаснинг юртимизга ташрифини амалга оширишга келишиб олинди.