ТОШКЕНТ, 17 октябрь. /"Дунё" АА/. Аввал маълум қилганимиздек, Кувайтнинг етакчи ишбилармон доиралари вакилларидан иборат делегация амалий сафар билан Ўзбекистонда бўлиб турибди, деб хабар қилмоқда "Дунё" АА мухбири.

Кувайт делегация таркибида "Kuwait Investment Co.", "KAMCO Investment Co.", "Alkandari General Trading Co.", "Alsalam Aloula Group", "Unique Goods", "Unique Co. for public trading", "Zenith Business Solution", "Sky Logistics Gen. Trading Co." ва "Golden Carpet" сингари етакчи компаниялари раҳбарлари ва вакиллари юртимизга келган.

Ташриф доирасида кеча пойтахтимизда Ўзбекистон–Кувайт бизнес-форуми ҳамда В2В форматидаги икки томонлама учрашувлар бўлиб ўтди.

Тадбирда Ўзбекистон Савдо-саноат палатаси раиси ўринбосари Дилшод Расулов, Кувайт Ташқи ишлар вазири маслаҳатчиси Аҳмад Мансур Ҳалаф Ал Алаж ва бошқалар маъруза қилдилар. Шунингдек, мамлакатимизнинг вазирлик ва идоралари вакиллари Ўзбекистон ҳамда Кувайт инвестицион салоҳияти ва савдо-иқтисодий муносабатларини ривожлантириш бўйича тадбиркорликнинг кенг истиқболлари намойиш этилган тақдимотлар билан қатнашди.

Форум якунлари бўйича, икки давлат ишбилармон доира вакиллари ўртасида В2В форматидаги икки томонлама учрашувлар ташкил этилди. Шу билан бирга, ҳамкорликни ривожлантиришга қаратилган қатор келишувларга эришилди.

Шунингдек, кувайтлик бизнес доиралари вакиллари форум давомида ташкил этилган "Made in Uzbekistan" кўргазмаси билан танишдилар.

Кувайт вакиллари 17-19 октябрь кунлари Фарғона вилояти Қўқон шаҳрида бўлади. Қўқонда Ўзбекистон-Кувайт бизнес-форуми ўтказилади. 

Бундан ташқари, делегация аъзолари 21 октябрь куни Сирдарё вилоятига боради.