ГУАНЧЖОУ, 30 ноябрь. /"Дунё" АА/. Ўзбекистоннинг Гуанчжоу шаҳридаги Бош консуллиги вакиллари Хитойнинг Донгуан шаҳри савдони ривожлантириш уюшмаси вице-президенти Хуан Хайтао бошчилигидаги делегация билан учрашди, деб хабар бермоқда "Дунё" АА мухбири.

Музокаралар чоғида Хитой томони Гуанчжоу шаҳрида бўлиб ўтган Ўзбекистон-Хитой бизнес-форуми донгуанлик тадбиркорларда катта таассурот қолдиргани, Ўзбекистон ҳудудлари ва тармоқлари билан ҳамкорликни янада кенгайтириш учун қўшимча платформа яратганини таъкидлади.

Учрашувда иштирок этган Донгуан шаҳри мебель саноати корхоналарининг вакиллари мамлакатимиздаги мебель ишлаб чиқарувчилар билан ўзаро ҳамкорлик қилишга тайёр эканликларини билдирдилар.

Хитой томонига Тошкентда Ўзбекистон мебельсозлик уюшмаси билан биргаликда мебель кластерини яратиш бўйича ишлар бошлангани ҳақида маълум қилинди. Ўзбекистон томони ушбу лойиҳа бўйича ҳамкорлик қилиш, Хитой тажрибаси ва инвестициясини жалб қилишга тайёр эканини таъкидлади.

Ўз навбатида, "Dongguan Baimuqiancheng Furniture" компанияси бош директори Сюй Цинхун қўшимча маълумотлар билан танишгач, Ўзбекистонга ташриф буюришга тайёрлигини билдирди.