ВАШИНГТОН, 10 сентябрь. /"Дунё" АА/. Ўзбекистон элчихонаси АҚШ пойтахтида ҳар йили ўтказиладиган текстиль фестивалида иштирок этди, деб хабар бермоқда "Дунё" АА мухбири.



Тадбир Жорж Вашингтон университетининг Текстиль музейида бўлиб ўтди. Унда 4 мингдан ортиқ текстиль ишқибозлари, санъатшунослар, пойтахт меҳмонлари ҳамда ОАВ вакиллари иштирок этди.

Фестиваль доирасида иштирокчиларга нақшлар яратиш тарихи ва усуллари, усталарнинг сулолалари, шунингдек, соҳадаги замонавий тенденциялар ва инновациялар ҳақида сўзлаб берилди.

Ўзбекистон миллий стенди ташриф буюрувчиларда алоҳида қизиқиш уйғотди. Унда "Gulnor art" бренди остидаги табиий ипакдан тайёрланган, ўзбек нақшлари билан безатилган маҳсулотлар намойиш этилди. Меҳмонлар Ўзбекистоннинг кўп асрлик маданиятини замонавий услуб билан уйғунлашган ҳолда акс эттирувчи каштасини юқори баҳоладилар. Ўзбек усталарининг асарлари нафақат нафосатлилиги билан ҳайратга солди, балки амалийлиги билан ҳам америкалик мода ихлосмандларининг эътиборини тортди.

Ўзбекистон миллий стенди энг кўп ташриф буюрилган стендлардан бирига айланди, бу эса америкаликларнинг мамлакатимиз тарихи, маданияти, анъана ва урф-одатлари билан яқиндан танишишга бўлган иштиёқи ортиб бораётганини яна бир бор тасдиқлади. Маданий тадбир ва концертга келганларнинг аксарияти Ўзбекистонга ташриф буюриб, қадимий меъморий обидалар, ўзбек халқининг бетакрор санъати ва анъаналарини ўз кўзлари билан кўриш истагини билдирди.

Бундан ташқари, "Silk Road Dance" рақс маркази ва таниқли хореограф Лаурель Грей ўзбек рақсларининг махсус номерларини намойиш этиб, Хоразм ва Бухоро рақс мактаблари классик ҳаракатларининг келиб чиқиши ҳақида сўзлаб беришди.

Жорж Вашингтон университетининг Текстиль музейи 1925 йилда ташкил этилган. Дастлаб, музей коллекциясига 275 та гилам ва 60 та бир-бирига боғлиқ тўқимачилик маҳсулотлари кирган. Унда ўзбек ҳунармандларининг XIX асрга оид юзлаб буюмлари ҳам сақланади.