ТОШКЕНТ, 3 март. /“Дунё” АА/. Яқин Шарқдаги вазиятнинг кескинлашуви ва минтақада сақланиб қолаётган мураккаб вазият муносабати билан Ўзбекистон Ташқи ишлар вазирлиги зиддиятни юмшатиш ва тартибга солишнинг сиёсий-дипломатик механизмларини илгари суришга кўмаклашишга қаратилган фаол дипломатик саъй-ҳаракатларни амалга оширмоқда, деб хабар бермоқда “Дунё” АА мухбири.

Шу муносабат билан Ташқи ишлар вазири Бахтиёр Саидов бир қатор давлатлардаги ҳамкасблари билан телефон орқали суҳбат ўтказди:

- Афғонистон ташқи ишлар вазири Мавлавий Амир Хон Муттақий,

- Покистон Бош вазирининг ўринбосари, ташқи ишлар вазири ва сенатори Муҳаммад Исъҳоқ Дор,

- Қатар Бош вазири ва ташқи ишлар вазири Шайх Муҳаммад бин Абдулраҳмон бин Жассим Ол Соний,

- Қувайт ташқи ишлар вазири Шайх Жарроҳ ас-Сабоҳ,

- Ўмон ташқи ишлар вазири Саид Бадр бин Ҳамад Ал-Бусаидий,

- Иордания Бош вазирининг ўринбосари, ташқи ишлар ва экспатриантлар ишлари вазири Айман Сафадий,

- Баҳрайн ташқи ишлар вазири Абдуллатиф бин Рашид Алзаяни,

- Озарбайжон ташқи ишлар вазири Жайхун Байрамов,

- Бирлашган Араб Амирликлари Бош вазирининг ўринбосари, ташқи ишлар вазири Шайх Абдулла бин Зоид Ол Наҳаён,

- Саудия Арабистони ташқи ишлар вазири, шаҳзода Файсал бин Фархон Ол Сауд,

- Испания ташқи ишлар, Европа Иттифоқи ва ҳамкорлик ишлари вазири Хосе Мануэл Албарес Буэно,

- Эрон ташқи ишлар вазири Аббос Аракчи.

Суҳбат чоғида томонлар Яқин Шарқдаги низоли вазиятнинг ривожланиши ва унинг эҳтимолий минтақавий оқибатлари, шунингдек, Афғонистон–Покистон чегараси бўйлаб содир бўлаётган қарама-қаршилик юзасидан фикр алмашди. Вазминлик кўрсатиш, вазиятнинг янада кескин тус олишига йўл қўймаслик ва дипломатик саъй-ҳаракатларни фаоллаштириш муҳимлиги таъкидланди.

Давлат суверенитети ва ҳудудий яхлитлик принципларига, халқаро ҳуқуқ нормаларига қатъий риоя этиш, ишонч чораларини мустаҳкамлаш ва юзага келаётган барча хавф-хатарларни фақат тинч, сиёсий-дипломатик воситалар билан ҳал этиш зарурлигига алоҳида эътибор қаратилди. Қатор суҳбатларда Ўзбекистон Президентининг тегишли давлатлар раҳбарияти ва халқларига бирдамлик, қўллаб-қувватлаш ва ҳамдардлик сўзлари етказилди.