ВАРШАВА, 19 май. /"Дунё" АА/. Польшанинг оммабоп "Agencja Informacyjna" онлайн портали  Самарқандда бўлиб ўтадиган кийим-кечак ва тўқимачилик маҳсулотлари ишлаб чиқарувчиларининг халқаро қўшма конгресси ҳақида мақола эълон қилинди, деб хабар бермоқда "Дунё" АА мухбири.

Нашрда 8-10 сентябрь кунлари Самарқанд шаҳрида тарихда илк бор Халқаро тўқимачилик ишлаб чиқарувчилар федерацияси (ITMF) ва Халқаро кийим-кечак федерацияси (IAF)нинг қўшма конгресси бўлиб ўтиши маълум қилинган.

"Конгресс ташкилотчилари – ITMF ва IAF халқаро федерациялари ҳамда "Ўзтўқимачиликсаноат" уюшмаси. Тадбир инновациялар, ҳамкорлик ва тартибга солиш – тўқимачилик ва тикувчилик саноатини ривожлантириш омиллари мавзусида бўлиб ўтади", – дейилади мақолада.

Самарқанддаги учрашув В2В ва B2G музокаралари давомида алоқаларни кенгайтириш, маҳаллий фабрикаларга саёҳатлар чоғида ўзбек тўқимачилик ва кийим-кечакларини ишлаб чиқариш жараёни, Ўзбекистон ва бошқа мамлакатлардаги ишлаб чиқарувчиларнинг тўқимачилик ярмаркаларида тақдим этилган таклифлари билан танишиш, мода намойишида иштирок этиш учун ноёб имконият яратида.

"Ушбу йирик иқтисодий тадбир Ўзбекистонда жаҳон тўқимачилик саноатининг 1000 дан ортиқ вакилларини бир жойга жамлайди. Европа, МДҲ, Осиё, Африка ва Америкадан 500 дан ортиқ халқаро ташкилотлар, тўқимачилик компаниялари, етакчи брендлар, ритейлер ва молия институтлари раҳбарлари йиғилиб, жаҳон тўқимачилик саноатини янада ривожлантириш масалаларини муҳокама қиладилар", – деб таъкидлаган нашрда.

Қайд этилишича, Ўзбекистон яқин-яқингача дунёдаги энг йирик пахта етиштирувчи давлатлардан бири сифатида танилган эди. Бироқ кейинги 10-15 йил ичида мамлакат пахта экспорт қилувчи давлатдан пахта импорт қилувчига айланди.

"Ўзбекистон бу хомашёни экспорт қилишни бутунлай тўхтатди ва барча маҳсулотларни ўзи қайта ишламоқда. Бундан ташқари, тўқимачилик ишлаб чиқариши шу даражада ривожландики, натижада республика маҳаллий саноат эҳтиёжлари учун пахтанинг сезиларли ҳажмини импорт қила бошлади", – деб ёзган портал.