ИСЛОМОБОД, 21 сентябрь. /"Дунё" АА/. Покистоннинг етакчи оммавий ахборот воситалари Ўзбекистон стартап экотизимини яхшилаш бўйича амалга оширилаётган ишларни кенг ёритмоқда, деб хабар қиляпти "Дунё" АА мухбири.

Жумладан, ушбу мамлакатнинг "Global News Pakistan" ахборот агентлиги ва "The Public Purview" газетасида "Ўзбекистоннинг стартап экотизими глобал инновацион марказга айланмоқда" сарлавҳали мақолалар эълон қилинди.

"Беш йил аввал Ўзбекистон стартап экотизими ёш деб ҳисобланарди. Бугунги тез ўзгариб бораётган бозор инвестиция фаоллигининг барқарор ўсиб бориши, янги венчур фондларнинг очилиши ва глобал иштирокнинг ортиб бориши билан белгиланади. Ўтказилган улкан иқтисодий ислоҳотлар ва инновацион миллий стратегия туфайли бошқа мамлакатларда ўнлаб йиллар давом этган ютуқларга қисқа вақт ичида эришилди. Ўзбекистон ўзини тадбиркорлар ва технологик жиҳатдан илғор компаниялар учун глобал марказ сифатида кўрсата бошлади", – дейилган нашрларда.

Покистон ОАВ таъкидига кўра, 2019 йилда ташкил этилганидан бери IT Park Uzbekistan мамлакатдаги рақамли инқилобда марказий роль ўйнади. Технологик марказ ва бизнесни тезлатувчи сифатида хизмат қилувчи IT Park давлат ва хусусий секторни боғлайди ва шу билан 3000 га яқин IT компаниялари ва стартаплар учун бизнес учун қулай муҳит яратади.

"ZeroRisk – бу хорижий IT компаниялар учун операцион ва тартибга солиш рискларини камайтириш учун мўлжалланган бозорга кириш дастури. Digital Startups – рақамли технология стартапларини дастлабки босқичда ривожлантириш ташаббусидир. Softlanding – уй-жой, ҳуқуқий ёрдам ва офис инфратузилмаси билан ёрдам беради. Local2Global – бу маҳаллий технология компанияларининг халқаро миқёсда кенгайишига ёрдам беришга қаратилган дастур. У кенг кўламли рағбатлантириш ва қўллаб-қувватлаш дастурларини таклиф қилади", – дея қайд этилган материалларда.

Таъкидланганидек, Ўзбекистонда IT Park резидентлари учун асосий солиқ имтиёзлари 0% ҚҚС, корпоратив даромад солиғи ва ижтимоий тўловларни ўз ичига олади. Хабда рўйхатдан ўтган стартаплар ҳам ушбу имтиёзларга эга бўлади.

Маълум қилинганидек, 2023 йилда Ўзбекистонда "Энг яхши рақамли технологиялар стартапи"ни эътироф этувчи ва ижодкорликни рағбатлантириш учун мукофот жамғармаси 1 миллион АҚШ доллари бўлган биринчи "President Tech Award" танлови ўтказилди.

"2024 йил якунига кўра, Ўзбекистонда ривожланишнинг турли босқичларида 400 дан ортиқ фаол стартап мавжуд. Уларнинг кўпчилиги аллақачон кенгайиш ва сезиларли ўсиш потенциалини намойиш этмоқда. Қиймати 1,1 миллиард долларга баҳоланган "Uzum" рақамли экотизими финтех, электрон тижорат ва банк ечимларини тақдим этади, Компания ҳозирда ойига 16 миллиондан ортиқ фойдаланувчини жалб қилмоқда ва йил давомида 150 миллион доллар соф фойда келтирган", деб таъкидланган манбаларда.

Ўзбекистонда "EPAM", "VEON" ва "Data Volt" каби етакчи трансмиллий компаниялар аллақачон фаолият юритмоқда. "Sturgeon Capital", "FinSight Ventures","Xanara Investment Management" ва 500 Global каби венчур капитал иштирокчилари ҳам мамлакатнинг ривожланаётган технологик соҳасига катта ҳисса қўшяптилар.

"Ўзбекистонда стартап йўналиши ўзининг дастлабки босқичларидан анча ривожланган. Инвестицияларнинг ҳажми, тузилиши ва частотаси ўсишга интилаётган амбицияли компанияларни қўллаб-қувватлаш учун қулай муҳит яратилаётганини кўрсатади. Ўзбекистон давлат томонидан қўллаб-қувватлангани, малакали кадрлар билан таъминланганлиги ва доимий ривожланиб бораётган капитал бозори туфайли янги уфқлар излаётган хорижий инвесторлар ва технология компаниялари учун ажойиб намуна бўлиб хизмат қилмоқда", – деб ёзган Покистон ОАВ.