ТОКИО, 29 апрель. /"Дунё" АА/. Япониянинг етакчи иқтисодий ва технологик нашрларидан бири – "Nikkei Xtech" платформасида Осака шаҳрида давом этаётган "Экспо-2025" Бутунжаҳон кўргазмаси ҳудудида қурилган Ўзбекистон павильонига бағишланган махсус мақола эълон қилинди, деб хабар қилмоқда "Дунё" АА мухбири.

Унда Ўзбекистон павильонининг архитектура ва дизайн ечимлари, замонавий инсталляциялар орқали тақдим этилган 360° видеолар, шунингдек, павильоннинг "Билимлар боғи" концепцияси ҳақида батафсил маълумот берилган. Ўзбекистоннинг Самарқанд шаҳри ва унинг машҳур "Мовий Самарқанд" (Samarkand Blue) мозаикалари, миллий маданий мерос элементлари инновацион ёндашувлар орқали кенг намоён этилгани қайд этилган.

"Павильоннинг қурилиши ва безак ишларида япон усталари иштирок этди ва унда Япониянинг юқори сифатли табиий материаллари қўлланилган", – дейилган мақолада.

Таъкидланганидек, 13 апрель куни очилган "Экспо-2025" кўргазмаси 13 октябрга қадар давом этади. Бутунжаҳон кўргазмасини ўтказиш бўйича Япония Ассоциацияси маълумотига кўра, 158 мамлакат иштирок этаётган мазкур тадбирга 6 ой давомида 28,2 миллион меҳмон ташриф буюриши кутилмоқда.