БЕЛГРАД, 7 сентябрь. /“Дунё” АА/. Сербиянинг “Politika” порталида “Ўзбекистон Президенти Сербияга келмоқда: кун тартибида “Air Serbia” тўғридан-тўғри қатновлари ва янги лойиҳалар” сарлавҳали мақола эълон қилинди, деб хабар бермоқда “Дунё” АА мухбири.

Нашрда ёзилишича, Ўзбекистон Президенти Шавкат Мирзиёевнинг Сербияга бўлажак расмий ташрифи эришилган сиёсий мулоқот ҳамда Тошкент ва Белград ўртасидаги муносабатларнинг шаклланган институционал асосини иқтисодий, инвестициявий, транспорт, таълим ва гуманитар лойиҳаларга айлантириш учун муҳим имкониятдир.

Икки давлат ўртасида ўзаро савдони кенгайтириш ва учинчи мамлакатлар бозорларига йўналтирилган қўшма ишлаб чиқаришни ривожлантириш учун етарлича шарт-шароит мавжуд.

Хусусан, Ўзбекистоннинг тўқимачилик, кимё саноати, озиқ-овқат маҳсулотларини қайта ишлаш ва машинасозлик соҳаларидаги ўсиб бораётган саноат салоҳияти Сербиянинг ишлаб чиқариш тажрибаси, унинг Европа Иттифоқи бозорига чиқиш имконияти ва кенг қамровли эркин савдо битимлари тармоғи билан уйғунлаши мумкин.

Материалда ҳамкорликнинг кейинги босқичи сифатида икки томонлама савдонинг нисбатан кичик ҳажмларидан узоқ муддатли саноат ва сармоявий шерикликка ўтиши келтирилган. Жумладан, ўзбек экспорти турларини кенгайтириш, юқори қўшимча қийматли маҳсулотлар улушини ошириш ва янада қулай савдо механизмларини излаш таклиф қилинмоқда.

Шунингдек, меҳнат мобиллиги соҳасидаги ҳамкорлик истиқболлари кўриб чиқилмоқда. Ўзбекистоннинг ташқи меҳнат миграцияси борасидаги тажрибаси ҳамда Сербия билан шундай механизмни шакллантириш имконияти қайд этилган.

Бу ишга жойлашишнинг шаффоф каналларини таъминлаш, меҳнат ҳуқуқлари ҳимоясини кучайтириш ва икки мамлакат ўртасида ишчи кучининг тартибга солинган ҳаракатчанлигига ёрдам беради.

Таълим ва илм-фан соҳасидаги ҳамкорликка ҳам алоҳида эътибор қаратилган. 2025 йил октябрь ойида имзоланган ҳукуматлараро битим муносабати билан ўзбекистонлик талабаларнинг “Сербияда тинчлик” дастурида кенг иштирок этиши кўзда тутилган.

Шу билан бирга, Ўзбекистоннинг 215 та университети ва Сербия олий ўқув юртлари ўртасида муҳандислик, ахборот технологиялари ва амалий фанлар соҳаларида ўзаро ҳамкорликни ривожлантириш имконияти мавжудлиги таъкидланган.