ИСЛОМОБОД, 7 сентябрь. /“Дунё” АА/. Ўзбекистон мустақиллигининг 35 йиллиги муносабати билан Покистоннинг “INVOICE” журналининг Ўзбекистонга бағишланган махсус сони чоп этилди, деб хабар бермоқда “Дунё” АА мухбири.

Нашрда юртимизнинг мустақиллик йилларида эришган ютуқлари, давлатимиз раҳбари бошчилигида амалга оширилаётган ислоҳотлар натижалари, халқаро майдонда илгари сураётган ташаббуслари, бой маданий-маърифий ва тарихий мероси ҳамда бошқа мавзуларга бағишланган материаллар эълон қилинди.

Президент Шавкат Мирзиёев иштирокида Янги Тошкентда бўлиб ўтган Ўзбекистон мустақиллигининг 35 йиллигига бағишланган тантанали маросим ҳақидаги мақола журналнинг бош саҳифасида чоп этилди.

Ватан равнақи ва юрт тараққиёти йўлида фидокорона меҳнат қилиб, юксак ватанпарварлик руҳи билан ўз ҳиссасини қўшиб келаётган юртдошларимизнинг давлат олий мукофотлари билан тақдирлангани ҳақида ҳам материал ёритилган.

Ўзбекистон ва Покистон ўртасидаги иқтисодий, савдо ва инвестициявий муносабатларнинг ҳозирги босқичи, икки томонлама ҳамкорликни янада ривожлантириш учун мавжуд имкониятлар ҳамда истиқболли йўналишларга бағишланган мақолалар ҳам муштарийлар эътиборини тортади.

Журналда Ўзбекистоннинг Покистондаги элчиси Алишер Тўхтаев билан эксклюзив интервью чоп этилган. Унда Ўзбекистон мустақилликнинг 35 йили давомида мамлакатимизда эришилган муҳим натижалар ҳақида сўз юритилган. Шунингдек, Ўзбекистон ва Покистон ўртасидаги стратегик шерикликнинг бугунги ҳолати, икки томонлама муносабатларнинг ривожланиши хусусида тўхталиб ўтилган.

Ўзбекистоннинг бой туристик салоҳияти, жумладан, қадимий ва тарихий шаҳарларимиз – Хива, Самарқанд ва Бухоро ҳақидаги материаллар ҳам муштарийлар эътиборига тақдим этилган.