ВАРШАВА, 10 июнь. /"Дунё" АА/. Польшанинг оммабоп "TVP Sport" порталида "ЖЧ-2026 саралаш ўйинлари. Ўзбекистон ва Иордания тарихда илк маротаба мундиалда" сарлавҳали мақола эълон қилди, деб хабар беряпти "Дунё" АА мухбири.

"Ўзбекистон ва Иордания терма жамоалари ўз тарихида илк бор жаҳон чемпионатига йўлланмани қўлга киритди. Ўзбекистон ушбу натижани Бирлашган Араб Амирликлари билан ўйинда, Иордания эса Ўмон билан баҳсда қўлга киритди", – дейилган мақолада.

Нашрда Ўзбекистон ушбу муҳим босқич сари узоқ ва машаққатли йўлни босиб ўтгани таъкидланди. "1991 йилда мустақилликка эришганидан буён Ўзбекистон еттита цикилда муваффақиясизликка учраган. Сўнгги саралаш босқичида эса бутун мамлакат орзулари ушалди. Ўзбекистон жаҳон чемпионатига йўл олди", – деб ёзилган материалда.

Шунингдек, мақолада Ўзбекистон терма жамоасининг Осиё ҳудуди саралаш босқичидаги ўйинлари батафсил ёритилган. Қайд этилганидек, Ўзбекистон терма жамоаси Эрон, БАА, Қатар, Қирғизистон ва Шимолий Корея билан рақобатлашган "А" гуруҳида ишончли ва барқарор ўйин кўрсатди.

"TVP Sport" да эълон қилинган  материал "Ўзбекистоннинг жаҳон чемпионатига чиққани мамлакат ва унинг футболи учун оламшумул ютуқ", – деган сўзлар билан якунланган.