ИСЛОМОБОД, 18 август. /“Дунё” АА/. Покистоннинг “Diplomatic News Agency” ахборот агентлиги ва “Islamabad Post” газетаси таниқли журналист Садриддин Суяровнинг “Мустақиллик авлоди – янги Ипак йўлининг йўл бошловчилари” сарлавҳали мақоласини эълон қилди, деб хабар бермоқда “Дунё” АА мухбири.

“Ёзнинг ўртасидаги кечки Тошкент Марказий Осиёнинг қоқ марказига кўчирилган жонли Ўрта ер денгизи мегаполисини эслатади, – деб ёзади муаллиф. – Шаҳар марказидаги коворкингнинг ёзги террасада бир гуруҳ ёшлар ўзбек тилидан бенуқсон инглиз тилига ўтиб, янги финтех-стартап архитектурасини қизғин муҳокама қилмоқда. Улардан бир неча километр нарида, Санъат галереяси залларида уларнинг тенгдошлари анъанавий ўзбек матоси – икат рақамли санъат призмаси орқали қайта талқин қилинган кўргазмани очмоқда”.

Нашрда таъкидланишича, бу замонавий пойтахт ҳаётидан оддий бир лавҳа эмас, бу – 2026 йил намунасидаги Ўзбекистон қиёфаси, ўз мустақиллигининг 35 йиллигини нишонлаётган мамлакат қиёфасидир.

Тарих учун ўттиз беш йил – жуда қисқа бир лаҳза. Аммо Ўзбекистон учун бу босқич ўзига хос, сезиларли аҳамиятга эга. Мамлакат ноёб демографик манзарага эга: аҳолининг 60 фоиздан ортиғини 30 ёшга тўлмаганлар ташкил этади. Бугун 35 ёшга кираётганлар – мустақил Ўзбекистон давлатчилиги билан тенгдош авлод. Мамлакатда уларни “Мустақиллик авлоди” деб аташади.

“Мустақиллик авлоди” янги алмашинув инфратузилмасини барпо этмоқда. Сўнгги бир неча йил ичида Ўзбекистон IT соҳасида таъсирчан сакрашни амалга ошириб, минтақавий технология истеъмолчисидан уларни экспорт қилувчи давлатга айланди. Бу трансформациянинг юраги Тошкентдаги IT Park ва унинг мамлакат бўйлаб филиаллари – технологик компаниялар учун махсус имтиёзли ҳудуд бўлди», – қайд этилган материалда

Агар ўн йил аввал мамлакатдан дастурий таъминот экспорти камтарона миқдорларда ўлчанган бўлса, бугун бу кўрсаткич юзлаб миллион долларга етмоқда, буюртмалар географияси эса АҚШ, Буюк Британия, Германия, БАА ва бошқа мамлакатларни қамраб олган.

Нашрда ўзбекистонлик ёш дастурчи Зиёбек Турдиевнинг ютуқлари эътироф этилган. Маълум қилинишича, у Америка логистика компаниясида оператор сифатида фаолиятини бошлаган у кейинчалик TheCarGo – АҚШ автотранспорт брокерлари учун сунъий интеллект асосида ишловчи операцион тизимни лойиҳалаб, ишга туширди. Платформанинг ўзига хослиги шундаки, унда инсон агентлари ва сунъий интеллект агентлари елкама-елка ишлаб, жараёнларни тўлиқ автоматлаштиради. Бугун TheCarGo мижозларининг 100 фоизи Америкадан, компаниянинг ойлик даромади эса икки бараварга ошган. Зиёбек ўз муваффақиятини қисқа ва лўнда тушунтиради: “Биз АҚШ бозорида талабни текшириш учун маҳсулот билан чиқдик – ва талаб улкан экан”.

Муаллиф таъкидига кўра, Ўзбекистон ёшлари мутлақо бошқача ҳуқуқий ва сиёсий маданиятни шакллантирмоқда. Европа, АҚШ ва Осиёнинг етакчи университетларида таълим олган ёш ҳуқуқшунослар, дипломатлар ва давлат хизматчилари бугун халқаро стандартларни миллий амалиётга интеграция қилмоқда.

Покистон ОАВда эълон қилинган мақолада Ўзбекистон ёшларининг овози жаҳон кун тартиби билан ҳамоҳанг янграётганининг ёрқин тасдиғи 2025 йил октябрь ойида Самарқандда ўтказилган ЮНЕСКОнинг XIV Ёшлар форуми бўлгани маълум қилинган. “Ҳаракатлар авлоди” шиори остида ўтказилган форумда дунёнинг 140 дан ортиқ мамлакатидан қарийб 150 нафар делегат иштирок этди. Форум тарихда биринчи марта Марказий Осиёда ўтказилди. У ЮНЕСКО Бош конференциясининг Самарқандда бўлиб ўтган 43-сессияси арафасида ташкил этилди. Ўзбекистоннинг ёш лидерлари иқлим кун тартиби ва маданий мерос масалалари муҳокамасига ўз таъсирини ўтказиб, уларнинг овози шунчаки минтақавий ташаббус эмас, балки глобал тараққиётга қўшилаётган ҳисса эканини намойиш этди.

“Инсон учун 35 ёш – ёшликдаги изланишлар ва амбициялар ўрнини англанган етуклик, стратегик фикрлаш ва дунёдаги ўз ўрнини аниқ тушуниш эгаллайдиган даврдир. Давлат учун ҳам бу босқич худди шундай маънони англатади. Ўзбекистон мустақиллигининг 35 йиллигини шунчаки эришилган ютуқлар юки билан эмас, балки ўн йиллар олдинга мўлжалланган аниқ тараққиёт йўналиши билан қарши олмоқда”, – дея урғуланган мақолада.