АР-РИЁЗ, 29 октябрь. /"Дунё" АА/. Саудия Арабистонининг оммабоп "Аль-Арабия" телеканалида Ўзбекистон сайёҳлик салоҳиятига бағишланган кўрсатув эфирга узатилди, деб хабар бермоқда "Дунё" АА мухбири.

Теледастурда Ўзбекистоннинг қадимий тамаддун ўчоғи, ислом тараққиёти бешиги эканлиги таъкидланган. Шунингдек, тарихий шаҳарлардаги ноёб архитектура намуналари ва маданий мерос, масжидлар кўплиги, ўзбек халқининг туристларга нисбатан меҳмондўстлиги, миллий ўзбек ошхонаси Ўзбекистонни араб сайёҳлари учун энг муносиб масканлардан бири сифатида намоён қилаётгани урғуланган.

Кўрсатувда ЮНЕСКОнинг Умумжаҳон мероси рўйхатига киритилган Самарқанд, Бухоро ва Хива каби қадимий шаҳарлар ҳақидаги маълумотлар ва лавҳалар ҳам томошабинлар эътиборига тақдим этилган.