ИСЛОМОБОД, 18 сентябрь. /"Дунё" АА/. Покистоннинг етакчи оммавий ахборот воситаларида Англиянинг Ливерпул шаҳрида бўлиб ўтган бокс бўйича жаҳон чемпионатида Ўзбекистон терма жамоасининг иштирокини кенг ёритди, деб хабар қилмоқда "Дунё" АА мухбири.

Жумладан "Associated Press of Pakistan – APP" марказий ахборот агентлиги, "Global News Pakistan" ахборот агентлиги, "The Diplomatic Insight" ва "Pakistan in the World" журналлари, "Pakistan Today",  "World Tribune" ва "The Khyber Mail" газеталари, "Margalla Tribune", "Election Times" ва "World News" янгиликлар онлайн платформаларида Ўзбекистон боксчиларининг мазкур дунё биринчилигида эришган юксак натижаларига бағишланган туркум мақолалар эълон қилинди.

Покистон нашрларида жорий йил 4-14 сентябрь кунлари илк марта "World Boxing" ташкилоти шафелиги остида ўтказилган жаҳон чемпионатида дунёнинг 68 давлатдан 540 нафар боксчи 20 та медаль тўплами учун рингга кўтарилгани, якунда Ўзбекистон терма жамоаси тарихий ютуқни кўлга киритгани эътироф этилган.

"Чемпионатда турли вазн тоифаларида эркаклар ва аёллар йўналишларида иштирок этиш учун 18 нафар спортчи билан қатнашган Ўзбекистон делегацияси 6 та олтин, 2 та кумуш ва 3 та бронза жами 11 та медалга эга чиқди. Ушбу натижа билан Ўзбекистон умумжамоа ҳисобида иккинчи ўринда қайд этди.

"Ўзбекистон эркаклар жамоаси 6 та олтин ва 1 та кумуш биринчи бўлди. Ўзбекистон эркаклар жамоаси мамлакат учун жаҳон чемпионатидаги рекорд натижани ўрнатди. Эркаклар орасидаги барча олтин медаллар фақатгина ўзбекистонлик ва қозоғистонлик боксчилар томонидан қўлга киритилди. Бу ҳолат Марказий Осиёнинг жаҳон боксидаги устунлигини яна бир бор тасдиқлади", – дейилган Покистон ОАВ тарқатган мақолаларда.

Нашрларда Тўрабек Ҳабибуллаев, Акмалжон Исроилов, Жавоҳир Умматалиев ва Фазлиддин Эркинбоев катталар ўртасидаги жаҳон чемпионатларидаги дебют иштирокидаёқ олтин медални эга чиққани, Асадхўжа Муйдинхўжаев ва Абдумалик Халоков эса икки карра жаҳон чемпиони сифатида тарихга киргани урғуланган.

Покистон оммавий ахборот воситалари тарқатган мақолалар хулосасида "Ливерпулдаги Ўзбекистон спортчиларининг ажойиб иштироки ва қўлга киритган ютуқлари мамлакатнинг бокс соҳасидаги шарафли анъаналарини янада мустаҳкамлади ҳамда "World Boxing" ташкилоти бошчилигидаги янги даврда ҳам етакчи бўлиш салоҳиятини намойиш этди", – деб ёзилган.