ТОШКЕНТ, 30 июнь /“Дунё” АА/. “Times Higher Education” (THE) халқаро рейтинг агентлиги томонидан Индонезияда бўлиб ўтган таълим конгресси доирасида эълон қилинган “THE Sustainability Impact Ratings 2026” рейтингига кўра, мамлакатимизнинг 24 та олий таълим муассасаси дунёнинг энг нуфузли 1000 та олийгоҳ қаторига кирди, деб хабар бермоқда “Дунё” АА мухбири.

Мазкур рейтинг жаҳон олий таълим муассасаларининг БМТнинг Барқарор ривожланиш мақсадларига қўшган ҳиссасини таълим сифати, илмий тадқиқотлар, институционал бошқарув, ижтимоий масъулият, экологик барқарорлик ва халқаро ҳамкорлик каби муҳим мезонлар асосида баҳолайди.

Рейтинг натижаларига кўра, энг юқори натижани Алишер Навоий номидаги Тошкент давлат ўзбек тили ва адабиёти университети ҳамда Тошкент давлат иқтисодиёт университети қайд этиб, 101–200-ўринлар гуруҳидан жой олган.

Шу билан бирга, Ўзбекистон Миллий университети ва “ТИҚХММИ” Миллий тадқиқот университети 201–300-ўринлар, Бухоро давлат университети, Самарқанд давлат тиббиёт университети, Термиз иқтисодиёт ва сервис университети 301–400-ўринлар диапазонидан жой олган.

Юртимиз олий таълим муассасалари барқарор ривожланишнинг айрим йўналишлари бўйича ҳам юқори кўрсаткичларга эришган. Жумладан, Алишер Навоий номидаги Тошкент давлат ўзбек тили ва адабиёти университети “Гендер тенглиги” йўналишида дунёда 8-ўринни эгаллаган. Тошкент давлат техника университети “Арзон ва тоза энергия” йўналишида 5-ўринни, Фарғона политехника институти эса 6-ўринни банд этган.

Тошкент давлат педагогика университети “Гендер тенглиги” йўналишида 20-ўринни, Термиз давлат университети ва Тошкент ахборот технологиялари университети “Арзон ва тоза энергия” йўналишида мос равишда 36- ва 48-ўринларни эгаллаган. Тошкент давлат тиббиёт академияси ва Самарқанд давлат тиббиёт университети “Саломатлик ва фаровонлик” йўналиши бўйича дунёнинг энг яхши 100 та университети қаторига кирган.

Маълумотларга кўра, ушбу рейтингда иштирок этаётган Ўзбекистон университетлари сони йилдан-йилга ортиб бормоқда. Агар 2021 йилда рейтингда 12 та олий таълим муассасаси бўлган бўлса, 2022 йилда бу кўрсаткич 30 тани, 2023 йилда 47 тани, 2024 йилда 53 тани ташкил этган. 2025 йилда бу кўрсаткич 59 тага етган. 2026 йилда рейтингга мамлакатнинг 50 та олий таълим муассасаси киритилган ва улардан 24 таси топ-1000 таликдан муносиб жой олган.