ТОШКЕНТ, 17 июнь. /“Дунё” АА/. Ўзбекистон пойтахтида бўлиб ўтаётган V Тошкент халқаро инвестиция форумида иштирок этаётган Ҳиндистоннинг “Gold Star Jewelry Pvt. Ltd.” ширкати бошқарувчи директори Ашиш Шоҳ “Дунё” АА мухбирига берган интервьюсида форум ҳақида ўз фикр-мулоҳазаларини билдирди:

– Исмим Ашиш Шоҳ. Мен Ҳиндистоннинг “Gold Star Jewelry Pvt. Ltd.” ширкати бошқарувчи директориман. Ўзбекистонга илк бор ташриф буюришим.

Ўзбекистонни “Google”дан қидирганимда, бу МДҲ давлатларидан бири эканини кўрган эдим. Бу ерда қандай одамлар, қанақа маданият борлигини билмасдим, бироқ одамлар ва уларнинг самимий кутиб олишидан ҳайратда қолдим. Интернетда кўрганларимиз билан бу ердаги ҳолат икки хил нарса экан. Бу ердаги муҳит анча яхши, форумнинг ўзи эса шунчаки ажойиб.

Биз бу ерга Ўзбекистонга кўпроқ сармоя киритиш ва қўшма корхоналар ташкил этиш учун келдик. Айни пайтда янги ҳамкорлик йўлларини излаяпмиз ва ўрганяпмиз. Ўзбекистонда жуда яхши ишбилармонлик муҳити шаклланган. Мамлакат турли давлатлардан сармоядорларни таклиф этмоқда ва бу ерда тўғри сармоявий муҳит яратилган.