ЛОНДОН, 17 июнь. /“Дунё” АА/. Британиядаги “Sturgeon Capital” компанияси венчур капитал йўналиши раҳбари Робин Батлер “Дунё” ААга V Тошкент халқаро инвестиция форуми ҳақида ўз фикр-мулоҳазаларини билдирди:

– Компаниямиз “IFC”, “SBI Holdings”, “Kazakhstan Investment Corporation”, “Chevron” каби институционал инвесторлар номидан хусусий капитал ва венчур сармоя стратегиялари орқали 300 миллион доллардан ортиқ активларни бошқаради.

Биз Ўзбекистонда қарийб саккиз йилдан бери фаолият юритиб келмоқдамиз. Мамлакатдаги биринчи венчур капитал инвесторларидан бири сифатида “Bills”, “Arzon Apteka”, “Oasis”, “Microcredit”, “Zip24” каби компанияларга инвестиция киритганмиз. Шу вақтгача юртингиздаги эрта босқичдаги компанияларга 15 миллион доллардан зиёд маблағ йўналтирдик.

Очиғини айтганда, мамлакатингиздаги тараққиёт суръати ва кўлами ҳайратланарли даражада ривожланмоқда. Бугунги даврни 7–8 йил аввал, илк бор бу ерда иш бошлаган пайтимиз билан таққослаб бўлмайди. Бунга ишонч ҳосил қилиш учун фақат Тошкентнинг замонавий осмонўпар биноларига назар ташлашнинг ўзи кифоя. Биз инвестиция қилишни бошлаган вақтларда стартаплар ва технологик инвестициялар тушунчаси деярли мавжуд эмас эди.

Ўзбекистон дунёдаги энг тез ўсиб бораётган стартап экотизимга айланиб бормоқда. “Uzum” каби компанияларнинг ички бозордаги муваффақияти бутун экотизим ривожига туртки бермоқда. Шунингдек, ўтган йили “TBC” томонидан “Sturgeon” портфелидаги “Bills” компаниясининг сотиб олиниши каби келишувлар ҳам келгусидаги ривожланиш учун муҳим катализатор бўлиши мумкин.

Албатта, стартап экотизими мамлакатда кечаётган катта ва жуда қизиқарли ўзгаришларнинг фақат бир қисми холос. Бу жараён сиёсий ва иқтисодий ислоҳотлар натижасида юзага келмоқда.

Тошкент халқаро инвестиция форумида яна иштирок этаётганимдан жуда мамнунман. Мен бу форумда аввал ҳам бир неча бор қатнашганман ва ҳар йили иштирокчиларнинг сифати, нуфузи, даражаси ҳамда географияси янада кенгайиб бораётганини кўриш мумкин.

Бу ерда бўлиш жуда ажойиб. Мен эски дўстлар билан яна учрашиш ва янги танишувлар қилишни интиқлик билан кутяпман.