ДЕҲЛИ, 12 май. /“Дунё” АА/. Ўзбекистоннинг Бангладешдаги элчиси (қароргоҳи Деҳли шаҳрида) Сардор Рустамбоев Дакка Савдо-саноат палатаси раиси Таскин Аҳмад билан онлайн шаклдаги учрашув ўтказди, деб хабар қилмоқда “Дунё” АА мухбири.

Музокараларда, шунингдек, Ўзбекистон Савдо-саноат палатаси раисининг маслаҳатчиси Алишер Шайхов иштирок этди.

Томонлар икки мамлакат ўртасидаги савдо-иқтисодий ҳамкорликни янада ривожлантиришнинг истиқболли йўналишларини муҳокама қилди. Тўқимачилик, фармацевтика, кимё ва чарм саноати, шунингдек, туризм соҳасининг юқори салоҳияти алоҳида қайд этилди.

Учрашувда мамлакатимизда барча соҳаларда амалга оширилаётган изчил ислоҳотлар натижалари, хорижий инвесторлар учун яратилган жозибадор ва қулай шароитлар, имтиёз ҳамда преференциялар тўғрисида батафсил маълумот берилди.

Ўз навбатида, Дакка Савдо-саноат палатаси раҳбари Ўзбекистонга 20 дан ортиқ тадбиркордан иборат бизнес-делегациясини юбориш режалаштирилганини маълум қилди.

Июнь ойига мўлжалланган ташриф доирасида бизнес-форум ташкил этиш ҳамда икки давлат ишбилармон доиралари вакиллари ўртасида икки томонлама B2B учрашувларини ўтказиш кўзда тутилган.

Дакка Савдо-саноат палатаси 1958 йилда ташкил этилган бўлиб, Бангладешдаги энг йирик ва фаол тузилмалардан бири ҳисобланади. Палата мамлакат бизнес ҳамжамиятининг, айниқса, кичик ва ўрта тадбиркорлик секторининг манфаатларини ифодалайди ва бугунги кунда унинг сафларида 5 700 дан ортиқ компания бирлашган.