КОПЕНГАГЕН, 12 май. /“Дунё” АА/. Ўзбекистон элчиси Раҳматулла Нуримбетов Дания компаниялари ва молия институтлари раҳбарлари билан бир қатор учрашувлар ўтказди, деб хабар бермоқда “Дунё” АА мухбири.

Хусусан, Дания экспорт-инвестиция фонди (“EIFO”) йирик лойиҳаларни молиялаштириш директори Йенс Хестбах билан бўлиб ўтган учрашувда Ўзбекистоннинг тоғ-кон саноати, “яшил” энергетика, балиқчилик ва агросаноат, чорвачилик ҳамда органик қишлоқ хўжалиги каби стратегик тармоқларига Даниянинг илғор технологиялари ва ноу-хауларини жалб этиш йўллари муҳокама қилинди.

Элчи, шунингдек, Даниянинг “FLS Smidth, “UNIBIO” ва “Aler Aqua” компаниялари раҳбарлари билан ҳам музокаралар олиб борди.

Учрашувлар якунида мазкур компаниялар ва “EIFO” ўз делегациялари билан V Тошкент халқаро инвестиция форумида иштирок этишини тасдиқлаб, ушбу анжуманни инвестициявий ва технологик лойиҳаларни амалий муҳокама қилиш учун самарали платформа сифатида кўришини қайд этди.